Por Europa Press / Redacción | SANTIAGO DE COMPOSTELA | 17/12/2021 | Actualizada ás 17:57
O deputado do BNG no Congreso, Néstor Rego, denunciou o uso de formas deturpadas de topónimos de cidades, pobos e núcleos de poboación de Galicia por parte da compañía aérea Iberia. O parlamentario nacionalista rexistrou varias iniciativas no Congreso para esixir que se respecte a toponimia propia de Galicia e reclama rectificar a información que ofrece a compañía aérea nos seus voos.
Así, pide ao Goberno que realice as xestións e negociacións oportunas para que a empresa respecte os topónimos galegos nas súas pantallas a bordo.
Segundo asegura Rego, a compañía aérea posúe aeronaves de fuselaxe ancha destinadas a voos intercontinentais. Estas teñen, en cada un dos asentos, pantallas con sistemas de entretemento que mostran, entre outras cousas, un mapa no que aparecen distintas cidades, pobos e núcleos de poboación da ruta que segue o avión.
Respecto diso, o deputado asegura que os topónimos mostrados cando atravesa Galicia non son os oficiais, senón que aparecen formas incorrectas e deturpadas.
"As leis e decretos que fixaron as denominacións oficiais en Galicia son de obrigado cumprimento tanto para entidades privadas como públicas, con todo, unha vez máis, temos que denunciar a vulneración da toponimia galega", lamentou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.