As peaxes da AP-9 subirán case un 3% a partir do 1 de xaneiro
Este incremento prodúcese "sen prexuízo das bonificacións parciais ou totais" que se aplican en tramos gratuítos como O Morrazo-Vigo e A Coruña-Barcala.
- A Xunta pide revisar os acordos con Audasa por "beneficios excesivos" da concesionaria
- O BNG reclamará que o Goberno anule as prórrogas da AP-9 e avoga por estudar o seu rescate
Por Europa Press / Redacción | SANTIAGO DE COMPOSTELA | 30/12/2021 | Actualizada ás 19:00
As peaxes da AP-9 subirán a partir do 1 de xaneiro de 2022 un 3 por cento, segundo anunciou este xoves o Ministerio de Transportes, Mobilidade e Axenda Urbana. Nun comunicado, o Goberno explica que con carácter xeral increméntanse un 1,97% as tarifas das autoestradas dependentes do Estado a partir do 1 de xaneiro de 2022 para axustalas ao Índice de Prezos ao Consumo (IPC).
No caso da AP-9 decrétase unha suba adicional para, segundo apunta Transportes, cubrir os custos por excesos de valoración de expropiacións ou pola execución de obras nas que incorreron as respectivas sociedades concesionarias, para financiar bonificacións de peaxe e para compensar a non aplicación de incrementos de tarifas inicialmente previstas por razóns de interese público.
No comunicado, o Goberno sinala que a subida das peaxes na AP-9 prodúcese "sen prexuízo das bonificacións parciais ou totais" que se aplican en tramos gratuítos como O Morrazo-Vigo e A Coruña-Barcala, así como no "esquema de bonificacións" aprobado por real decreto o pasado mes de xullo.
