A Xunta concede axudas a 72 universitarios en programas de mobilidade en países extracomunitarios
Cada un dos estudantes recibirá 1.700 euros.
Por E.P. | SANTIAGO DE COMPOSTELA | 06/01/2022 | Actualizada ás 16:23
A Xunta de Galicia concedeu 72 axudas para o alumnado universitario a países extracomunitarios para o cuso 2021/2022. O goberno galego recupera así esta liña de axudas despois de que a pandemia imposibilitase que se levara a cabo o ano pasado.
Segundo informa, dos beneficiarios 15 son alumnos da Universidade de Santiago de Compostela, 22 da da Coruña e 35 da Universidade de Vigo. Cada un dos estudantes recibirá unha axuda de 1.700 euros.
O obxectivo desta liña de axudas é "favorecer a mobilidade internacional dos estudantes do Sistema Universitario de Galicia" para que o alumnado poida integrarse nunha comunidade internacional e multicultural que "mellorará os seus coñecementos profesionais e lingüísticos".
Para acceder á axuda os requisitos eran estar matriculados neste curso académico nun grao dunha universidade galega e participar no programa de mobilidade universitaria coa autorización de ambas as universidades.
