Ence xa ten vendido a produción das súas fábricas en 2022, 1,1 millóns de toneladas de celulosa

Ence, a principal papeleira de Galicia, xa pechou acordos de venda para 1,1 millóns de toneladas de celulosa para este ano 2022. Un acordo que, segundo apunta a fábrica, "supón cubrir o máximo de produción das biofábricas da compañía para o presente exercicio".

Principalmente, os acordos de venda alcanzados teñen por destino o mercado europeo, no que Ence ten importantes vantaxes competitivas loxísticas e de servizo ao cliente. "A través destas operacións, a compañía logra aumentar a súa cota de mercado no continente, e mellorar o seu posicionamento en segmentos crave e que se atopan en crecemento, como o tisú, as especialidades e o packaging", indica nun comunicado.

Ademais, a pasteira destaca o incremento da súa marca “Ence Advanced”, que aumentou ata superar o 20 por cento do total comprometido. Trátase de celulosa especial destinada a multitude de aplicacións que permiten a substitución de fibra longa por fibra curta; e de fibras sintéticas, como os plásticos, por fibras de orixe natural procedentes da madeira, "que permiten contribuír ao avance cara á  bioeconomía circular", destaca.

"Ence logra desta maneira unha posición de referencia nun mercado no que a demanda mundial de papel experimentou un crecemento importante durante o pasado ano, grazas á recuperación global tras a crise sanitaria de segmentos como as especialidades e os papeis gráficos", suliña a empresa que insiste en que "é un referente internacional na produción ecoeficiente de celulosa cos máis altos estándares ambientais".