A Xunta constata o interese dos concellos máis pequenos por dotarse dun plan básico de ordenación
Trátase dun instrumento para garantir "un urbanismo ordenado, responsable e sustentable".
Por E.P. | SANTIAGO DE COMPOSTELA | 09/02/2022 | Actualizada ás 18:40
A Xunta constatou o interese e a receptividade dos concellos máis pequenos para dotarse dun plan básico de ordenación, como instrumento válido para garantir "un urbanismo ordenado, responsable e sustentable".
A conselleira de Medio Ambiente, Ángeles Vázquez, acompañada da directora xeral de Ordenación do Territorio, Encarnación Rivas, o delegado territorial da Xunta en Lugo, Javier Arias, e o delegado territorial da Xunta en Ourense, Gabriel Alén, mantivo unha reunión cos alcaldes de Alfoz, Guntín, Samos, Beariz, Lobeira, Punxín, San Cristovo de Cea, Viana do Bolo e Dozón e os equipos redactores dos seus plans básicos municipais.
Ante eles, lembrou que se trata dunha figura de ordenación prevista na Lei do chan e pensada para os concellos máis pequenos --de menos de 5.000 habitantes--, aos que dar amparo urbanístico, mentres non xurdan iniciativas de maior complexidade que aconsellen a elaboración dun plan xeral.
Deste xeito, destacou a conselleira, "Galicia foi pioneira" á hora de facilitar un urbanismo "válido e acorde á normativa" en vigor; "atallando os escollos máis frecuentes" aos que se enfrontan as administracións locais máis pequenas, "a falta de medios económicos e, sobre todo, de recursos técnicos".
Con iso, os concellos citados dotaranse dun instrumento básico co que se ordenará o seu territorio e brindaráselles da posibilidade de ofrecer unha acollida residencial e económica, que se traduza nun aumento das posibilidades para o tecido empresarial e para as persoas que escollen estes municipios para vivir.
Unha vez superados os trámites iniciais, como a obtención da cartografía das case 100.000 hectáreas que suman os nove concellos, as empresas adxudicatarias destes contratos xa están a traballar nas memorias xustificativas, na catalogación de elementos a protexer e nos informes ambientais estratéxicos.
A conselleira destacou que, ademais da axuda económica de case 800.000 euros para a redacción dos plans e os traballos cartográficos, teñen á súa disposición ao persoal técnico da Dirección Xeral, así como das xefaturas territoriais, para avanzar nesta tarefa.
