A Deputación de Pontevedra aproba novos investimentos do 'Plan Concellos' e axudas para turismo e cultura
Carmela Silva anunciou tamén a celebración do 57 Concurso Exposición da Camelia, que este ano se desenvolverá en Pontevedra o 5 e 6 de marzo.
Por E.P. | SANTIAGO DE COMPOSTELA | 25/02/2022 | Actualizada ás 12:07
A presidenta da Deputación de Pontevedra, Carmela Silva, destacou este venres que na Xunta de Goberno Provincial aprobáronse 1,7 millóns de euros do 'Plan Concellos' en recursos que beneficiarán a 10 municipios, así como máis axudas para turismo e cultura.
Estes recursos irán destinados, por unha banda, á humanización do viario da Igrexa de Santa María de Arbo á Capela de San Pedro, neste municipio de Arbo, explicou.
E un total de 1,5 millóns de euros en nove axudas destinaranse para a contratación de 182 persoas nos concellos de Sanxenxo, Meaño, Cambados, Pontecesures, Cuntis, Portas, Cerdedo-Cotobade, Poio e Tui.
Así mesmo, o goberno provincial aprobou o convenio con Vilaboa para executar as obras de mellora da seguridade viaria e peonil na estrada EP-0104 Ramal Igrexa de Figueirido, cunha actuación principal na senda peonil de 636 metros.
Estes traballos están orzados en 503.000 euros que financia a Deputación de Pontevedra integramente sumando a achega do 'Plan Concellos'.
CULTURA E TURISMO
Carmela Silva anunciou que a Deputación de Pontevedra aprobou as bases para achegar 650.000 euros en novos recursos á cultura e ao turismo a través dun sistema de concorrencia competitiva.
No primeiro caso, serán 250.000 euros para asociacións que realizan actividades culturais, outros 150.000 aos festivais de cinema que se desenvolven baixo a marca Rías Baixas Filme Fest e 150.000 euros máis para festivais musicais e de artes escénicas.
Respecto ao turismo, destinaranse 100.000 euros "para actividades de carácter turístico desenvolvidas por entidades que pon en valor os recursos da provincia".
CONCURSO EXPOSICIÓN
A presidenta da Deputación de Pontevedra anunciou, ademais, a celebración do 57 Concurso Exposición da Camelia que este ano se desenvolverá en Pontevedra o 5 e 6 de marzo, nunha gran carpa de 600 metros cadrados que se instalará na Avenida de Montero Ríos fronte ao Pazo Provincial para mostrar os exemplares que se presenten a esta cita.
"Temos un gran programa que comeza coa inauguración que será o sábado ás 17,30 horas no noso Salón de Plenos", dixo a presidenta. A través deste evento sobre a camelia ponse en valor un importante patrimonio natural e difúndense os resultados dos traballos de análises, estudos e investigacións que levan a cabo na Estación Fitopatolóxica de Areeiro.
Xa se atopan publicadas as bases do certame no Boletín Oficial da Provincia. O prazo para presentar solicitudes de participación finaliza o 28 de febreiro. Cada participante deberá indicar no formulario as modalidades nas que desexa participar e elixir o espazo para expor.
A organización habilitará un lugar especial fóra de concurso para que as persoas cultivadoras menores de idade e cultivadores que non concursen tamén poidan expor as súas flores. "Pomos en valor a camelia, a flor das Rías Baixas e icona do noso importante patrimonio natural", destacou Carmela Silva.
