Vox augura que entrarán "con forza" nas proximas municipais en Galicia

O eurodeputado de Vox, Jorge Buxadé, eludiu confirmar en que concellos presentará o seu partido lista propia nas próximas eleccións municipais, pero si incidiu en que traballan con esa idea en toda España. "Presentarémonos alí onde podamos presentar unha lista capaz de representar os intereses dos galegos. Hai unha clara vontade de chegar a todas as institucións e representar aos españois alí onde haxa un proceso electoral", aseverou.

Buxadé expresouse así este sábado, antes de intervir nas 'Xornadas sobre a cría e tenencia ordenada de animais de compañía', onde "se trata de coñecer, informar e ver que consecuencias ten o proxecto de lei de benestar animal de Goberno".

Tamén sobre as próximas eleccións municipais en Galicia, Buxadé afirmou que Vox "ten o mesmo proxecto para España en Madrid, en Coruña, en Sevilla, etc." e que incorrería en "un erro" se "explicase cousas concretas" da Coruña.

Os alicerces principais para a formación son "garantir a seguridade das persoas, unha baixada radical de impostos e o fomento do emprego, e ordenar o gasto político", destacou. "Con toda seguridade, o Concello de Coruña, como todos os concellos, gasta inxentes cantidades de diñeiro en gasto político ineficiente e ineficaz, que non redunda en beneficio dos galegos", sinalou.

Para Buxadé, a situación en Galicia "acredita" o "crecemento permanente" de Vox. "Nas próximas eleccións municipais estou seguro de que imos entrar con moita forza", vaticinou o eurodeputado, que remarcou que "en Galicia se detectan xa problemas relativos a inseguridade por estranxeiros non acompañados, que están ilegalmente en territorio nacional".

"Hai que pór outra vez, en primeiro lugar, o obxectivo de reindustrializar Galicia, o emprego que se está perdendo e a defensa da agricultura, a gandaría e a pesca, base fundamental do modo de vida dos galegos", insistiu.

Respecto ao proxecto de lei de benestar animal, Buxadé indicou que prexudicará a actividades "tan importantes" como a caza, a cetraría, as actividades zoolóxicas ou mesmo o circo. "É a típica norma globalista: baixo palabras aparentemente bonitas esconde medidas moi restritivas", aseverou.

Entre elas, destaca, "non se permitirá o acoso dun animal a outro, no que podemos estar de acordo, pero no fondo esconde un ataque contra a caza tradicional ou os zoolóxicos". "Terán que explicar aos nenos españois por que non van poder ir ao zoo. É moi grave que se queira conceder case máis dereitos aos animais que ás persoas", manifestou o eurodeputado.

A este respecto censurou que "durante moitos anos o consenso progre acabase coa idea da dignidade humana, permitindo o aborto sen restricións e a eutanasia". "Cremos que hai que protexer o patrimonio, a fauna e a flora, pero nunca por encima do ser humano", concluíu.

VISITA A MALPICA

Por outra banda, o eurodeputado de Vox tamén visitou esta mañá Malpica  para "facer un seguemento" ás demandas dos pescadores da zona e visitar á nai dun mariñeiro falecido en 2018 "polas tremendas condicións de inseguridade no acceso ao porto". "Queriamos ver se a Xunta o solucionaría, pero en ano e medio non se fixo nada. Imos seguir esixindo que a Xunta acometa as obras necesarias", reclamou.

Buxadé sinalou ao Estado das Autonomías como culpable do "centralismo dos gobernos autonómicos, que en Galicia se representa nos intentos de concentrar toda a actividade pesqueira nun ou dous portos, deixando abandonadas a centenares de familias que viven do seu traballo en portos pequenos como Malpica e Barizo".

No porto de Barizo, o eurodeputado reuniuse cunha decena de pescadores e membros do club náutico, que lle explicaron "a falta de mantemento e conservación que sofren as súas instalacións". Jorge Buxadé comprometeuse a trasladar esta mesma semana as súas demandas a Bruxelas, "co obxectivo de que as institucións comunitarias presionen á Xunta para facerse cargo dos labores de mantemento e rehabilitación que permitan ao porto volver funcionar como porto pesqueiro e club náutico".

"A Xunta gástase millóns en subvencións a medios ou chiringuitos ideolóxicos mentres abandona aos traballadores, cando podería atendelos con investimentos que son alcanzables para a Administración", censura.

O eurodeputado de Vox, Jorge Buxadé, con mariñeiros en Malpica (A Coruña). VOX | Fonte: Europa Press