A minaría causa un "gravísimo impacto" sobre os ríos galegos, denuncian asociacións ecoloxistas

Acusan á administración autonómica de "esconder" o estado real das masas de auga afectadas coa localización das Estacións do Programa de Control Operativo, xa que moitas delas sitúanse a "moita distancia do foco de contaminación".

Por Europa Press / Redacción | SANTIAGO DE COMPOSTELA | 13/03/2022 | Actualizada ás 19:56

Comparte esta noticia

Numerosas asociacións ecoloxistas aproveitan a celebración do Día Mundial de Acción na Defensa dos Ríos, que se conmemora este luns, para denunciar o "lamentable estado" de "moitos" ríos galegos polo impacto "gravísimo" da minaría.

As organizacións critican que Augas de Galicia e a Dirección Xeral de Recursos Naturais, a pesar de ser coñecedores desta situación, manteñen unha "total inacción" fronte á contaminación "causada polas explotacións mineiras".

Así mesmo, acusan á administración autonómica de "esconder" o estado real das masas de auga afectadas coa localización das Estacións do Programa de Control Operativo, xa que moitas delas sitúanse a "moita distancia do foco de contaminación". Ademais, critican a "ausencia total" de inspeccións e sancións, polo que aseguran que non é posible realizar un control "adecuado" da contaminación procedente das explotacións mineiras.

Sobre isto, pon como exemplo algúns lugares que sofren esta afectación como a Mina de Touro, a de Varilongo ou a de San Finx.

As organizacións ecoloxistas e veciñais sinalan as "graves deficiencias" que atopan na normativa aplicada e no programa de medidas para mellorar as condicións de explotación e o mantemento dos aproveitamentos mineiros.

A isto, as asociacións suman os "constantes obstáculos" que aseguran pon a administración galega para a participación das organizacións ecoloxistas e veciñais nas medidas de protección que poderían axudar á conservación das masas de auga en Galicia.

Por todo isto, reclaman "un xiro de 180º" nas políticas ambientais da Xunta para facer fronte a esta "ameaza ambiental" para ríos, regachos e o litoral e rías galegas.

Rolda de prensa de medio centenar de colectivos en contra do proxecto da mina de Touro-O Pino.
Rolda de prensa de medio centenar de colectivos en contra do proxecto da mina de Touro-O Pino. | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta