O centro histórico de Pontevedra quedará libre de colectores co novo contrato de xestión de residuos

O novo contrato de xestión de residuos do Concello de Pontevedra permitirá que a zona monumental da Boa Vila quede libre de colectores de lixo, co obxectivo de "salvagardar o centro histórico para goce de todos e todas". Así o explicou o concelleiro de xestión dos residuos municipais, Raimundo González, quen compareceu este luns en rolda de prensa para informar de que o goberno local opta por un sistema de colocación de colectores pola tarde en distintos puntos do centro histórico, que serán recollidos unhas horas despois, cando os residentes depositasen o lixo.

Raimundo González explicou que o contrato deixará aberta a posibilidade ao licitador de estender este sistema aos colectores de reciclaxe. Na actualidade, no centro histórico, existe a recolleita "porta a porta" de papel-cartón e vidro. A nova aposta mantén este servizo e ofrece ao licitador a posibilidade de que os colectores de reciclaxe, incluídos os envases, sexan de "quita e pon". Raimundo González indicou que, con esta decisión, o goberno local non está a pensar no encarecemento do servizo senón en "adecualo en función da tipoloxía do espazo".

O concelleiro desvelou esta singularidade do próximo contrato do lixo despois de que a Xunta de Goberno Local deste luns aprobase o réxime xurídico que terá o servizo, que se rexerá por unha concesión de servizo, é dicir, que o adxudicatario non terá unha retribución fixa senón que será variable (con beneficios ou penalizacións) en función de obxectivos.

Ademais, aprobouse o Anteproxecto de explotación e o Plan de viabilidade, que recolle os custos do servizo: salarios, medios, tratamento, entre outros detalles, e que garante a viabilidade do equilibrio económico da concesión. Neste futuro contrato recóllese que o servizo de recollida de lixo prestarase os 7 días da semana en todo o ámbito urbano e na periferia, e 2 ou 3 días á semana nos ámbitos de poboación diseminada.

Tamén contempla a renovación de gran parte dos medios materiais do servizo aos 10 anos da súa entrada en vigor, desde os camións, pasando polos colectores ata a maquinaria da futura planta de compostaxe. O investimento inicial do contrato ascende a 23,2 millóns de euros "de entrada", matizaba o concelleiro, porque a obrigación de ter que renovar gran parte dos medios materiais aos 10 anos situará o investimento ao final do contrato en preto dos 40 millóns de euros. Tamén van incluídos os 10,2 millóns de euros da planta de compostaxe.

A tramitación do novo contrato da xestión dos residuos municipais continúa agora coa preparación cos pregos administrativos e técnicos e a súa posterior aprobación por parte da Xunta de Goberno, e a apertura do proceso de contratación. A licitación será por un valor de 10,7 millóns de euros.

I CAMPIONATO DE TAPAS DE GALICIA

O Concello de Pontevedra e a Academia da Tapa e do Pintxo abriron este luns as inscricións gratuítas para que para que hostaleiros do catro provincias galegas midan as súas habilidades no I Campionato de Tapas de Galicia, unha competición, en formato "showcooking", celebrarase en Pontevedra do 2 ao 3 de maio. En concreto, os participantes neste certame optarán a máis de 3.000 euros en premios dos produtos das marcas patrocinadoras e colaboradoras.

A convocatoria está especialmente dirixida a profesionais en activo, representantes dun establecemento hostaleiro situados na Coruña, Lugo, Ourense ou Pontevedra que dispoña de barra e teñan unha oferta continua de tapas durante todo o ano. O prazo de inscrición permanecerá aberto ata o 11 de abril a través do formulario habilitado na páxina web do campionato www.academiadelatapa.com.

O programa do concurso foi presentado este luns no Concello de Pontevedra nun acto no que interviñeron a concelleira de Promoción Económica, Yoya Branco, e o presidente da Academia da Tapa e o Pintxo, Mikel Martínez. Yoya Branco destacou que "este pioneiro Campionato Galego de Tapas é un gran paso máis no proxecto de Pontevedra Capital Gastro" e o "firme obxectivo" de converter esta cidade na Capital Española da Gastronomía 2023.