Xapón, un novo mercado para Galicia?
Feijóo inicia unha viaxe por este país para abrir mercados na área de turismo, agricultura, pesca, tecnoloxía e automoción.
Por Galicia Confidencial | Compostela | 30/05/2014 | Actualizada ás 09:00
Primeiro foi México, logo Panamá e agora Xapón. O presidente da Xunta decidiu viaxar ao país nipón para “estreitar” os lazos culturais e económicos con este país. Serán seis días nos que Alberto Núñez Feijóo ve “unha gran oportunidade porque Xapón é a terceira economía mundial e unha das referencias culturais do mundo".
Xunto co presidente galego viaxan tamén o conselleiro de Economía da Xunta, Francisco Conde, e a secretaria xeral de Turismo da comunidade galega, Nava Castro. E é que pretende abarcar varias áreas; desde a turística, á comercial ou económica.
Así, no ámbito do sector primario, a comitiva tamén coñecerá unha das principais instalacións de acuicultura, a da Universidade de Kinki (oeste) que está dedicada á cría de atún vermello. Tamén adicará un día a manter contactos cos principais representantes da industria do automóbil en Xapón.
Así, visitará unha factoría de Nissan o vindeiro luns na prefectura de Kanagawa (centro) e reunirase co presidente e os directivos da Asociación de Fabricantes de Automóbiles de Xapón (JAMA). Tamén destacou a importancia que terá a visita e a reunión con representantes do Instituto de Investigación do Automóbil (JARI) de Xapón, dada a presenza en Vigo do Centro Tecnolóxico de Automoción de Galicia (CTAG), un dos núcleos de investigación con máis peso de Europa.
Telecomunicacións
A delegación galega tamén manterá un encontro con representantes de NTT Data Everis, xigante nipón en tecnoloxía da información. E este é para Feijóo “un sector importantísimo en Galicia polas facultades de telecomunicacións e de enxeñaría informática da comunidade e tamén polas empresas galegas".
Durante a súa estancia, o presidente galego visitará a rexión de Wakayama (oeste), onde percorrerá un tramo da ruta de peregrinación de Kumano-Kodo, que está hermanada co Camiño de Santiago e tamén é Patrimonio Mundial da UNESCO. Alí tamén se reunirá co gobernador da rexión, Yoshinobu Nisaka, que visitou Santiago de Compostela en 2012.
O presidente da Xunta engadiu que a viaxe tamén serve para "corresponder á invitación" que realizou persoalmente na súa visita a España en xuño de 2013 o príncipe herdeiro de Xapón, Naruhito, con quen se reunirá o martes na súa residencia oficial en Tokio. En todo caso, haberá que agardar para ver en que se concretan estas visitas para a economía galega.
