Por Europa Press / Redacción | SANTIAGO DE COMPOSTELA | 19/03/2022 | Actualizada ás 18:27
A Deputación de Ourense asumirá os custos da expedición liderada polo alcalde de Maceda, Rubén Quintas, para levar material humanitario á fronteira de Ucraína e traer a 20 refuxiados --nove menores e once mulleres--. Así o confirmou o presidente da Deputación de Ourense, Manuel Baltar, que se reuniu no Pazo Provincial co rexedor ourensán.
O alcalde de Maceda agradeceu a implicación da institución provincial desde o comezo da iniciativa solidaria e explicou tamén que o proceso de adaptación dos refuxiados é gradual, "sen présa, pero sen pausa". Tras chegar a Maceda o pasado domingo, 13 de marzo, os nenos e as súas nais iniciaron un proceso de adaptación en coordinación coas administracións, Cruz Vermella e Protección Civil, cos pertinentes recoñecementos médicos e psicolóxicos, trámites administrativos e a súa progresiva instalación en pisos.
SAÍDA CAMIÓN HUMANITARIO
A Deputación informou ademais de que este luns está prevista a saída do primeiro camión cargado de material humanitario desde o centro loxístico activado pola Deputación, "co obxectivo de canalizar e coordinar a resposta dos concellos ourensás ante a guerra de Ucraína".
O envío do material humanitario, recollido polo Concello de Ourense e almacenado no parque da maquinaria pola institución provincial, foi organizado por AGA-Ucraína e financiado por Afundación e Abanca. A Deputación, recuedan, organizou un dispositivo --posto en marcha pola área de Benestar--, onde un grupo de traballo técnico agrupa toda a información sobre as iniciativas que se estean levando a cabo desde o ámbito municipal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.