Un proxecto europeo loita por sacar á luz os contaminantes das augas galegas
A investigación de Nor-Water pretende deseñar novos métodos para identificar os residuos tóxicos dos mananciais do país e o norte de Portugal.
Por E.P. | SANTIAGO DE COMPOSTELA | 19/03/2022 | Actualizada ás 20:41
O proxecto europeo Nor-Water conseguiu mellorar e deseñar novos métodos de identificación dos contaminantes emerxentes presentes nas augas superficiais costeiras e fluviais de Galicia e do Norte de Portugal. Ademais, tamén permitiu desenvolver ferramentas para mitigar a presenza destes compostos nos ecosistemas.
A Consellería do Mar informou nun comunicado que os resultados do proxecto permitirán implantar medidas de xestión ambiental para mitigar a presenza destes elementos e mellorar a eficiencia das estacións depuradoras de augas residuais (EDAR) de Galicia e tamén do norte de Portugal.
Os integrantes deste proxecto centraron os seus esforzos no últimos tres anos en desenvolver novos métodos analíticos e ferramentas de predición e modelado para os contaminantes emerxentes máis prexudiciais para os ecosistemas, así como fórmulas para mellorar a eficacia dos sistemas de tratamento para a súa eliminación.
As zonas que se estudaron no proxecto Nor-Water foron as costas e zonas fluviais do sur de Galicia e do norte de Portugal, en concreto, a ría de Vigo, os ríos Miño e Limia e os ríos Ave e Cávado. Á súa vez, tamén foron seleccionadas seis estacións depuradoras de augas residuais para o seu estudo.
Así, o grupo de expertos de Nor-Water realizou tres campañas en 2021 cun total de 100 mostras recollidas nas que se constatou a presenza de distintos contaminantes emerxentes. A Consellería informou que as tecnoloxías desenvolvidas permitirán "unha eliminación superior ao 80%" de 15 dos 19 contaminantes de interese emerxente seleccionados, obtendo auga tratada que podería ser empregada "con fins de irrigación".
