Xeal pon en marcha un cuarto forno en Cee
Faino tras finalizar un investimento de 2 millóns de euros.
Por E.P. | Santiago de Compostela | 05/04/2022 | Actualizada ás 17:10
Xeal, antiga Ferroatlántica, acaba de iniciar a posta en marcha dun cuarto forno na súa factoría de Cee, tras finalizar un investimento de 2 millóns de euros. Tal como informou a compañía, a posta en marcha do forno 12 de ferrosilicio de Cee supón que na actualidade catro dos seu cinco fornos están a operar a "plena carga", aproveitando unha oportunidade de demanda "rendible" que ofrece o mercado na actualidade.
O forno desconectouse a finais de novembro do ano pasado para acometer unha profunda reforma para a modernización e automatización da zona de coada.
"O máis destacado da reforma é a incorporación de equipos automáticos de apertura e selado das bocas de coada, carros porta-cubilotes autónomos que se operan a distancia usando telemandos, unha nova ponte guindastre de 25 toneladas de carga para a manipulación e vertedura dos cubilotes que conteñen a aliaxe líquida e o redeseño e ampliación dos sistemas de captación de fumes difusos do proceso", indicou Xeal.
A compañía explicou que a reforma se centra nos catro eixos estratéxicos da empresa, mellorando a seguridade no desempeño da actividade, o cumprimento da normativa ambiental, o coidado e mantemento dos activos a longo prazo e a mellora da eficiencia e a produtividade.
Respecto deste último, os novos equipos permitirán aumentar a competitividade e que o forno 12 de Cee sexa o máis competitivo de Xeal e un dos máis competitivos de Europa.
Tras a reactivación do forno 14 de silicomanganeso a pasada semana, a fábrica supera o 80% da súa actividade total de produción en funcionamento.
