Galicia terá unha oficina itinerante para ofrecer asesoramento ás persoas refuxiadas
Tradutores e profesionais de servizos sociais atenderán ás máis de 1.400 persoas que hai en Galicia.
Por E.P. | SANTIAGO DE COMPOSTELA | 12/04/2022 | Actualizada ás 13:18
A Xunta vai poñer, a partir da próxima semana, a disposición das persoas refuxiadas ucraínas que residen en Galicia unha oficina itinerante que percorrerá distintos puntos para darlles "asesoramento, información e respostas a todas as preguntas que teñan", segundo anunciou a conselleira de Política Social, Fabiola García. Segundo datos oficiais, actualmente hai máis de 1.400 persoas regularizadas en Galicia, máis de 200 na Coruña.
Fabiola García visitou este martes o almacén da Asociación Galega de Axuda (AGA Ucraína), acompañada polo delegado territorial da Xunta na Coruña, Gonzalo Trenor, e a presidenta de AGA Ucraína, Natalia Afonina. Durante o acto, a conselleira explicou que esta unidade móbil contará con tradutores e profesionais dos servizos sociais que acompañarán e asesorarán as persoas ucraínas sobre todos os recursos que teñen en Galicia á súa disposición. Segundo asegurou, van "poñer o foco" en todos os refuxiados para "acompañalos, atendelos e coidalos".
Natalia Afonina, pola súa banda, explicou que cada semana "actualizan as necesidades" e agora pídenlles tendas de campaña, mantas e roupa deportiva. Ademais, insistiu na necesidade de enviar alimentos. "Comida sempre necesitamos máis", recalcou. Mentres, destacou que a cidadanía galega é "marabillosa" e "cada día traen caixas e caixas e doan moito diñeiro", á vez que lembrou que calquera persoa pode ir a "calquera punto de recollida". Hai máis de 100 repartidos por toda Galicia e pódese consultar a súa localización nas redes sociais da asociación.
TRECE CAMIÓNS
Ata o momento, saíron de Galicia con destino a Ucraína 13 camións, tres autobuses e catro coches, con máis de 300 toneladas de axuda. A conselleira sinalou durante a súa visita que a administración está a pór a disposición das persoas "todos os recursos" que teñen nestes momentos desde o ámbito sanitario, a nivel de documentación, camas para todas as persoas que chegan enfermas e todas as vacinas que necesiten.
No ámbito educativo, García indicou que hai máis de 200 crianzas escolarizadas en escolas galegas e, respecto ao mundo laboral, destacou a necesidade de que aprendan "canto antes" o idioma para que se incorporen ao mercado. A responsable de Política Social lembrou tamén as 1.400 camas que puxeron a disposición do Goberno central para que as persoas que veñan poidan vivir en Galicia "como na súa propia casa".
