Denunciados por facer unha carreira a máis de 200 km/h nunha autovía

A Garda Civil detectou e denunciou aos condutores de dous coches que disputaban unha carreira a máis de 200 quilómetros por hora na autovía AG-31, que une as localidades ourensás de Rante, en San Cibrao das Viñas, e Celanova.

Ocorreu o pasado 3 de maio, cando o Subsector de Tráfico da Garda Civil recibiu o aviso pola presenza dos dous vehículos avariados na beiravía. Ao chegar, os axentes observaron estacionados a ambos os turismos. Os condutores relataron que un deles sufrira unha avaría e estaba a esperar a chegada do guindastre, mentres que o outro o acompañaba na espera.

No entanto, ante a sospeita de que estivesen involucrados nunha competición de velocidade, solicitouse o visionado das cámaras da autovía para verificar se se cometeu algún delito ou infracción.

De tal forma, as imaxes desvelaron que ambos os coches circularon en paralelo durante aproximadamente 700 metros. Un deles, ademais, foi captado a 204 km/h, polo que se puido concluír que estaban a disputar unha carreira.

Polos feitos descritos formuláronse boletíns denuncia a cada un dos condutores por establecer unha competición de velocidade na vía pública sen estar autorizada, o que supón unha sanción de 500 euros e a retirada de 6 puntos do carné de conducir.

Dous axentes da Garda Civil nun control de tráfico | Fonte: Eduardo Parra - Arquivo