O BNG pide ao Goberno que free un macroparque eólico baixo sospeita

O BNG demandou ao Goberno estatal a paralización dos trámites para autorizar a construción do parque eólico Brancellao, que suporá a instalación de 25 aeroxeradores con tres de reserva a través dos concellos coruñeses de Boimorto, Curtis, Vilasantar, Frades, Mesía, Ordes e Carral.

O deputado do BNG no Congreso, Néstor Rego, rexistrou este martes unha iniciativa para reclamar ao Goberno a cancelación do proxecto debido á súa "incompatibilidade cos valores ambientais, patrimoniais, socioeconómicos e paisaxísticos", segundo afirmou a formación política.

Rego denunciou o "impacto negativo" que o parque eólico Brancellao terá sobre os distintos recursos ambientais do sete concellos afectados, por exemplo os ríos As Gándaras, Mendo e Muíños. Ademais, advertiu da afectación a zonas de alto valor natural como a reserva As Mariñas Coruñesas ou o encoro de Abegondo-Cecebre, que, asegura, estarán afectadas pola instalación do parque.

FRAGMENTACIÓN IRREGULAR

O proxecto é promovido por Enel Green Power España S.L., empresa encargada doutros parques limítrofes como o parque eólico Caíño. Ante esta superposición de propostas, Rego denunciou que a "división é intencionada e pretende ocultar a interdependencia entre ambos os parques". 

A fronte nacionalista demanda a paralización dos proxectos eólicos en trámites para Galicia ante a "proliferación descontrolada destes parques" na comunidade, pois supoñen "un risco para o patrimonio natural e cultural", aseverou. Rego sinalou a necesidade de realizar un novo deseño de desenvolvemento eólico "de forma conxunta" coa Xunta de Galicia, asentado en criterios de "proporcionalidade, racionalidade e equilibrio, protexendo o patrimonio natural e respectando as actividades de aproveitamento agrícola e forestal", manifestou.