Abanca Galega, probábel novo nome de Novagalicia
A entidade é titular ou está tramitando numerosas variacións sobre o nome "Abanca", tanto rexistrando dominios da Internet como solicitando marcas na Oficina Española de Patentes.
Por M.V. | Santiago | 22/06/2014 | Actualizada ás 10:34
A nova denominación de Novagalicia Banco é o segredo máis protexido do plan de negocio de Banesco. Con todo, existen varias pistas que apuntan a que Abanca pode ser o nome escollido.
A primeira pista é unha foto dunha oficina de Novagalicia, cun letreiro tapado pero no que se pode intuír debaixo do plástico as letras de "Abanca". A imaxe foi publicada en Twitter polo xornalista Jorge Alonso Álvarez, que tamén publica unha imaxe do que sería o novo logotipo, procedente do rexistro oficial de marcas. Nas redes sociais tamén circula a información de que varias oficinas teñen novos letreiros, tapados como o da imaxe.
A hipótese de "Abanca" gaña peso ao consultar a Oficina Española de Patentes y Marcas. Abanca de Galicia e Abanca Galega son dúas das 20 marcas que aparecen a nome Caixa De Aforros De Galicia Vigo Ourense e Pontevedra no rexistro oficial. Hai outros, como Abanca Corporación que están en trámite tras seren solicitados este anos.
Deses 20 nomes xa rexistrados, os únicos que parecen plausibles para bautizar unha nova entidade son as variacións de Abanca, o resto ou xa foron utilizados (Novagalicia Banco, etc.) ou non cadran para unha entidade financeira tradicional.
Abanca de Galicia e Abanca Galega foron rexistrados a finais de 2010, despois da fusión das caixas. Trataríase pois dun nome xa estudiado como posíbel alternativa.
Esta posibilidade confírmase aínda máis no Who Is, a base de datos que publica os nomes dos titulares dos dominios de internet. Entre os 81 rexistros a nome de NCG Banco están abancagalega.com (renovado este xaneiro), abancadegalicia.com (renovado este xaneiro), abancadegalicia.org (renovado en marzo), abanca.com (renovado en xuño) e abanca.net (renovado en xuño). Varios destes identificadores teñen activada a opción que permite ocultar o nome do titular, aínda que as IPs apuntan a servidores de NCG Banco.
A entidade financeira ten previsto, en principio, desvelar o seu novo nome este xoves. O banco fixo onte unha exhibición de poderío ao xuntar 4.800 empregados na Coruña para explicarlles o novo plan de negocio, aprobado pola UE este xoves.
