Axudas de ata 10.000 euros para os menores de 35 anos que adquiran a súa primeira vivenda en pequenos concellos
Por Europa Press / Redacción | SANTIAGO DE COMPOSTELA | 02/05/2022 | Actualizada ás 17:21
A Xunta anunciou que convocará este mes de maio as axudas dirixidas a menores de 35 anos para a adquisición de vivendas en municipios de menos de 10.000 habitantes. Este novo programa da Consellería de Medio Ambiente, Territorio e Vivenda conta cun orzamento de, como mínimo, 1,5 millóns de euros e ten como obxectivo que os mozos galegos poidan acceder a subvencións de ata 10.800 euros para comprar a súa primeira vivenda habitual.
Segundo trasladou a Consellería nun comunicado, estas axudas resultan de especial interese para Galicia por ser unha comunidade na que 257 dos seus 313 concellos teñen menos de 10.000 veciños e, por tanto, os menores de 35 anos poderán beneficiarse deste tipo de incentivos á hora de comprar a súa vivenda.
A conselleira en funcións, Ángeles Vázquez, visitou este luns o concello coruñés de Cabana de Bergantiños, no marco dun dos encontros informativos #ConstruíndoFogar organizados polo seu departamento cos que percorre diferentes comarcas galegas para dar a coñecer o conxunto de subvencións en materia de vivenda que se convocarán ao longo do ano 2022.
Precisamente, na comarca da Costa da Morte, a Xunta informou que terán acceso a estas axudas os mozos menores de 35 anos de 14 dos 16 municipios que integran esta área -- Cabana de Bergantiños, Camariñas, Cee, Coristanco, Corcubión, Dumbría, Fisterra, Laxe, Malpica de Bergantiños, Muxía, Ponteceso, Vimianzo, Zas e Cerceda -- cumpren co requisito de poboación esixido para poder beneficiarse do programa.
Neste sentido, destacou que no marco da convocatoria de 2021 destas axudas, limitadas neste caso a concellos de menos de 5.000 habitantes, houbo un total de novo beneficiarios na zona: tres que compraron a súa vivenda habitual en Fisterra; outro tres que o fixeron en Corcubión; dous máis en Muxía; e un no municipio de Laxe.
