O 66% da poboación pediátrica está vacinada contra a COVID-19
Dos 177.577 menores chamados a vacinarse en Galicia contra a Covid, 136.365 contan con polo menos unha dose da vacina, que constitúe o 76,8% da poboación diana, fronte ao 54,4% de media de España.
Por Europa Press / Redacción | SANTIAGO DE COMPOSTELA | 13/05/2022 | Actualizada ás 17:15
Galicia continúa á cabeza da vacinación pediátrica --de cinco a 12 anos-- contra a Covid-19 en España ao contar co 65,7 por cento da poboación diana deste rango de idade con pauta completa, fronte ao 43% da media nacional.
Así se reflicte no informe actualizado este venres, 13 de maio, polo Ministerio de Sanidade, recollido por Europa Press, no que se indica que 116.728 nenos de cinco a 12 anos dunha poboación de 177.577 desas idades contan con pauta completa en Galicia, o 65,7%.
Por tanto, a galega continúa á fronte das comunidades autónomas en vacinación pediátrica, seguida de Extremadura (63%) e Asturias (59,3%), con respecto ás doses postas ata o 11 de maio.
Dos 177.577 menores chamados a vacinarse en Galicia contra a Covid, 136.365 contan con polo menos unha dose da vacina, que constitúe o 76,8% da poboación diana, fronte ao 54,4% de media de España.
MAIORES DE 12 ANOS
En canto aos maiores de 12 anos, o informe do Ministerio de Sanidade reflicte que dos 2.456.127 chamados a vacinarse contra a Covid-19, un total de 2.341.733 contan con polo menos unha dose, que supón o 95,3%, fronte ao 93% de media de España.
En canto aos que xa finalizaron o proceso, 2.347.366 dispoñen de pauta completa na Comunidade galega, que supoñen o 95,6 por cento, fronte á media estatal do 92,6%. Deste xeito, continúa Galicia en segundo lugar en porcentaxe de poboación vacinada, tras A Rioja (97,3%). En terceiro lugar destaca Extremadura (95,5%), á que segue Asturias (95,3%).
