As exportacións portuarias crecen un 13% en Galicia mentres en España caen un 6%

As cinco autoridades portuarias de interese xeral da Comunidade Autónoma (Ferrol-San Cibrao, A Coruña, Marín-Ría de Pontevedra, Vigo e Vilagarcía de Arousa) embarcaron nos seus peiraos máis de 3,3 millóns de toneladas nos cinco primeiros meses do ano (último dato confirmado por Portos do Estado), o que supón un 13,4% máis que no mesmo período do ano pasado. Este aumento contrasta coa evolución do conxunto do sistema portuario estatal de interese xeral (as 28 autoridades portuarias), que mostra unha caída do 6,6% en relación co balance de xaneiro a maio de 2021.

Con este dato, os cinco grandes portos galegos rompen a barreira dos 3 millóns de toneladas cargadas nos seus peiraos, un límite ao que se aproximaron os exercicios anteriores, aínda que sen pasalo.

O incremento das exportacións (preto de 400.000 toneladas máis) é, con todo, a metade do que representan as importacións, que tamén aumentaron considerablemente, aínda que sen superar os niveis pre-pandemia. Así, polas dársenas desembarcáronse 8,3 millóns de toneladas, case un millón máis que nos cinco primeiros meses do ano pasado, pero lonxe aínda dos 9,4 millóns de 2019.

Do total do tráfico portuario rexistrado neste período (11,6 millóns), as exportacións representan o 28,6%, unha décima máis.

Aínda que no cómputo xeral dos grandes portos galegos prodúcese un incremento, non todos o fan. Así, os dous máis relevantes en termos de tráfico, A Coruña e Ferrol-San Cibrao, experimentan un gran crecemento neste capítulo: a segunda sobe un 22,6%, mentres que a primeira faino case o dobre e supera a barreira do millón de toneladas.

As outras tres presentan peores números que en 2021: Marín-Ría de Pontevedra exportou entre xaneiro e maio un 4,9% menos; Vigo, un -12,2% e Vilagarcía de Arousa, un 10,5% menos.