A Federación de Comercio contra as medidas de aforro enerxético: "parece que se tomaron logo dunha opípara comida"

O presidente da Federación Galega de Comercio, José María Seijas, arremeteu contra as medidas do Goberno para aforrar enerxía, ás que cualifica como "inconscientes e inconsecuentes".

"Como sempre, tócalle ao comercio as malas operacións que finalmente saen adiante", quéixase o empresario lucense. Seijas ten claro que estas restricións "non van influír" en economizar enerxía, "tanto o de apagar escaparates como o ter que modificar todo o que se refire a os novos sistemas nas portas".

"Non é a solución, hai que tomar outras medidas consecuentes e analizar e estudar todo para buscar unha solución viable a este problema", incidiu José María Seijas. Pide "ter unha seguridade" de que as medidas que se toman "van ser eficientes".

Cualifica estas propostas como "un parche". "Parece máis que son decisións tomadas despois dunha opípara comida cando os ánimos están quentes", sostén.

Finalmente, Seijas augurou que o "futuro" se presenta "moi difícil", sobre todo en relación ao que vai ocorrer cunha "inflación disparada" tras o verán.

Cámara de Comercio da Coruña