Regresa o Festival Internacional de Curtas de Verín cunha sección oficial de 18 proxectos

O Festival Internacional de Curtas de Verín-Vía XVI desenvolverase entre o martes 30 de agosto e o domingo 4 de setembro cunha selección oficial de 18 proxectos audiovisuais e cunha ampla axenda de actividades. A presentación do festival tivo lugar este martes coa participación do director do certame, Carlos Montero, quen destacou que a cita verinesa "evolucionou cara a un modelo de festival máis participativo" e, por iso, "cun maior número de actividades para todos os públicos".

Montero agradeceu que sexa posible co "incremento de patrocinios privados" e tamén os públicos, entre o que destacou ao Concello de Verín e á Deputación de Ourense. Ademais do director do festival interveu na presentación o rexedor municipal, Gerardo Seoane, que manifestou "a honra" que supón para o concello apoiar este evento, que "constitúe un perfecto exemplo de resiliencia cultural, porque naceu, creceu e afrontou con éxito dificultades como os tempos de pandemia, sendo un orgullo para Verín".

Na mesma liña se expresou a edil de Cultura, Emilia Somoza, que agradeceu a todo o equipo de traballo que fai posible o festival "a súa implicación e esforzo edición tras edición". Pola súa banda, a deputada provincial, Patricia Torres, recoñeceu a importancia do festival, "unha forte aposta pola cultura non só na comarca senón na provincia".

PROGRAMACIÓN

Ao longo do festival proxectaranse dezaoito curtametraxes enmarcadas en tres categorías, 'Horizontes', 'A Raia', e 'Nova', que contarán con cintas chegadas dunha ducia de países. O certame arrincará o martes día 30 cun acto inaugural na Praza Maior de Verín, tras o cal o trío Casperverk musicalizará en directo o filme "The cameraman" de Buster Keaton.

No marco da axenda do festival tamén haberá tempo para as actividades paralelas, a primeira baixo o título de "Sopa cómica", unha iniciativa pensada na cativada da comarca para descubrirlles o cinema. Tamén destaca a proxección de "Mauthausen: regreso ao campo da morte", unha obra dirixida e guionizada hai máis de tres décadas polo xornalista e historiador galego Manolo Torrente, que aborda a historia de dous galegos que conseguiron saír con vida do campo de concentración.

Así mesmo, durante toda a semana do festival o 'Espazo Roombo' da localidade acollerá no exterior do auditorio de Verín actividades relacionadas coa "música, a gastronomía, os encontros profesionais e a espontaneidade cultural". Ademais, todos os anos o FIC convida a outro festival, neste caso será o Galician Friki Filme Festival, co que porán de novo o foco nun dos alicerces fundamentais de Verín e o seu festival: o Entroido.

Farano a través de narrativas menos convencionais. Por unha banda, proxectarase unha sesión de curtas cuxo fío condutor será o Entroido "desde unha visión de orixe e posta en común das diferentes tradicións ao redor do mundo", que finalizará cunha curta filmada a comezos do século pasado en Laza.

Por outra banda, representarase unha performance na que colaborarán o Fulión de Mormentelos e Kotodama Teatro. A clausura do certame terá lugar o 4 de setembro no Auditorio de Verín. Estará presentada pola xornalista local Esther Estévez, recentemente distinguida como mellor comunicadora na gala dos premios Mestre Mateo.