As redes de alta tensión cercan Santiago ante a "deixadez" do Concello

A problemática dos eólicos e, en conxunto, das instalacións eléctricas vencelladas á "transición enerxética", parecen marcadas polo principio político da capitalidade. Na Comunidade de Madrid non se ven muíños de vento, por exemplo, unha problemática que en certa medida afecta tamén a nivel autonómico con Santiago: onde están os que deciden non se poñen cousas feas. 

A dinámica podería cambiar tras o anuncio dun proxecto dunha liña de alta tensión que podería afectar á contorna de Santiago e máis concretamente ao Espazo Natural do Souto, unha zona boscosa situada ao suroeste da capital, máis alá da Rocha Vella e que de acordo coa Plataforma pola Recuperación do Sar "suporía un grave impacto sobre a paisaxe local, afectando ao patrimonio arqueolóxico, etnográfico e natural do Souto".

Como adoita pasar, a historia está en que a zona potencialmente afectada é Espazo Natural de Interese Local (ENIL) dende que tal protección se propuxera e aprobara en pleno municipal, sen ningún voto en contra, o 27 de novembro do 2019. Pero esta protección non garante nada. Segundo explican dende a asociación, o proxecto vén de saír do DOG  e está actualmente en exposición pública a información, formando parte dun proxecto maior que se estendería até Mazaricos. 

"No seu último tramo", inciden, "dito proxecto tería un impacto demoledor sobre o Espazo Natural do Souto, situado entre os concellos de Santiago e Ames. A construción da devandita infraestrutura destruiría unha ampla superficie do espazo e fraccionaríao en dúas áreas máis pequenas e vulnerábeis, reducindo significativamente o seu valor ecolóxico e paisaxístico e comprometendo a estabilidade do ecosistema".

Dende a plataforma lembran que o ámbito do Souto xa foi obxecto de ameaza nos últimos anos polo proxecto da nova EDAR para Compostela. "Grazas á mobilización da sociedade civil e de numerosos colectivos, O Souto salvouse de tal afección. Tras este episodio, instouse ao goberno local de Santiago á declaración do Souto como Espazo Natural de Interese Local (ENIL), nomeadamente polo seu valor patrimonial, arqueolóxico e etnográfico, ademais do natural". "Falamos fun ámbito que acolle numerosas devesas e carballeiras, charcas oligotróficas, eutróficas, e brañas, á vez que especies de fauna protexidas polas Directivas Europeas: a papuxa do mato, a lontra, a ra patilonga, a píntega rabilonga e o caracol de Quimper, entre outras", explican.

DESIDIDA DO GOBERNO DO PSOE

A plataforma explica que nese 2019 presentou unha lista de “demandas e propostas”, nove accions a curto e medio prazo e que se levaron ao pleno do concello de Santiago de Compostela, celebrado o 27 de novembro do 2019. A proposta foi aprobada nese pleno cos votos a favor de todas as forzas políticas alí representadas, agás dos do PSOE, que se abstivo. "Dende entón, o goberno local no deu ningún paso cara á materialización da figura de protección, feito que lamentamos dende a Plataforma pola Recuperación do Sar. Chegamos, así, ao presente, finais de agosto do 2022, sen ningunha medida adoptada. A deixadez do goberno local consecuencias como a que agora observamos: unha nova ameaza que sobre O Souto, que non existiría de terse protexido coa figura do ENIL como se aprobou en dito pleno municipal".

Diante destas circunstancias, a asociación volve instar ao goberno local a que "presente alegacións e se persone contra o trazado proposto para esta infraestrutura". "Do mesmo xeito, animamos á cidadanía a que consulte os detalles e afeccións desta liña de alta sensión, de impacto irreversible para O Souto. Desde a Plataforma pola Recuperación do Sar solicitamos a modificación do proxecto, de xeito que non fenda un espazo de valor incalculable", inciden.

CA PRESENTARÁ ALEGACIÓNS

Compostela Aberta vén de lanzar a súa particular denuncia contra unha situación de "risco" pola que tamén responsabilizan a Bugallo, ao que acusan de "perder tres anos". Dende a formación avanzan que presentarán alegacións contra o proxecto e poñen un pequeno detalle máis ao relato de Recuperación do Sar: o PP optou tamén pola abstención dun proxecto que agora podería afastar as torres de alta tensión de Compostela.

A declaración de ENIL é competencia da @Xunta. Ao @PazodeRaxoi corresponderíalle solicitalo e presentar o plan de conservación do espazo.
Pero que ao @psdegsantiago e aos @PopularesStgo non lles interesaba o Souto xa quedou claro no Pleno. pic.twitter.com/Q41PAk6Y1c

— Compostela Aberta (@compostelaberta) August 31, 2022