A Xunta pide a Madrid "o mesmo compromiso" que Portugal coa conexión de AVE O Porto-Vigo
Por E.P. | SANTIAGO DE COMPOSTELA | 30/09/2022 | Actualizada ás 13:32
A Xunta de Galicia esixiu ao goberno central "o mesmo compromiso" que o exhibido polo Executivo de Portugal coa conexión por alta velocidade ferroviaria entre a cidade lusa do Porto e Vigo.
Así o trasladou a conselleira de Infraestruturas e Mobilidade, Ethel Vázquez, durante unha comparecencia en Lugo, na que puxo en valor "o compromiso do goberno de Portugal coa conexión do Porto con Vigo" e manifestou o seu desexo de que "o Goberno de España teña o mesmo compromiso".
"Pedimos ao Goberno de España un cronograma claro, unha planificación clara, con estudos, con proxectos, con obras, con investimentos, da mesma forma que Portugal", reclamou. Sobre a continuidade da conexión desta liña con Madrid e a necesidade de que se aceleren os proxectos de Alta Velocidade na conexión con Galicia, Vázquez subliñou que "a saída sur de Vigo e a conexión con Portugal sempre foi unha das prioridades da Xunta de Galicia".
"Nas reunións periódicas cos diferentes ministros é un asunto que é prioritario. A Eurorrexión é unha fortaleza que temos en Galicia, somos países irmáns e o Norte de Portugal e Galicia son un potencial de competitividade que temos, polo que o saída sur de Vigo foi prioritaria e segue sendo prioritaria", sinalou, antes de recalcar que "é fundamental que exista esa implicación, esa planificación e cronograma concreto de investimento para ese saída sur".
