Por E.P. | Ourense | 03/10/2022 | Actualizada ás 17:46
Os gobernos de Galicia e Portugal investirán, no período 2022-2025, 16,4 millóns de euros (dous millóns no caso da administración galega) para garantir o desenvolvemento sustentable da Reserva da Biosfera Transfronteiriza Gerês-Xurés, segundo confirmou este luns a conselleira de Medio Ambiente, Territorio e Vivenda, Anxos Vázquez.
Durante a presentación do plan de xestión deste espazo natural (que engloba seis concellos galegos e cinco portugueses), a conselleira explicou que este documento se publicará esta semana no Diario Oficial de Galicia, DOG, e que recolle as liñas estratéxicas e accións a desenvolver no próximo trienio.
O obxectivo, destacou, "é impulsar as actividades transfronteirizas de cooperación entre ambas as rexións" para conseguir un desenvolvemento económico sustentable, combinando a preservación do patrimonio natural e cultural, o turismo e as necesidades dos habitantes deste espazo.
No caso de Galicia, o investimento será de algo máis de dous millóns de euros, xa que o territorio galego na reserva supón só o 24 % do total, e o 12 % da poboación.
Estes fondos destinaranse a catro eixos estratéxicos: imaxe e identidade, desenvolvemento socioeconómico, conservación da natureza e participación e integración social.
Entre as medidas previstas hai un programa de educación ambiental e cultural, actuacións agroforestais e ambientais, restauración de patrimonio arquitectónico, organización da oferta turística, utilización de novas tecnoloxías para a posta en valor do territorio, ampliación e mellora de hábitats e especies vexetais autóctonas, ou accións de formación dirixidas a poboación e axentes locais.
Por outra banda, a Consellería prevé destinar 618.000 euros á restauración ecolóxica de masas de 'quercus pyrenaica' e á sinalización complementaria, adecuación de infraestruturas e adaptación da accesibilidade.
Así mesmo, en 2022 e no marco da convocatoria de axudas para reservas da biosfera en Galicia, adxudicáronse máis de 700.000 euros a concellos e entidades do Xurés para financiar actuacións como recuperación de ecosistemas fluviais, mellora de bosques de especies frondosas, mellora de sendas ou restauración da biodiversidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.