Por Europa Press / Redacción | A CORUÑA | 19/10/2022 | Actualizada ás 17:41
A Unión Sindical e Técnicos Sanitarios (USAE) denunciou a agresión a dous técnicos de emerxencias sanitarias da Coruña e pide "máis compromiso" do servizo de urxencias 061 e que sexan estes profesionais considerados "autoridade sanitaria".
Nun comunicado, explica que a agresión se produciu a pasada noite na Coruña cando dous técnicos, tras o aviso do 061, acudiron a asistir a un paciente "e este negouse a ser atendido, agredindo verbalmente a unha das compañeiras, e fisicamente ao outro compañeiro, propinándolle varias puñadas ata que, finalmente, foi separado por uns familiares, quen llo levaron antes de que chegase a Policía".
"Esta agresión súmase ás que tiveron lugar hai un mes en Barbanza e Pontevedra", indica este sindicato que engade que "xa entón, o 061 comunicou ás empresas nas que traballaban os compañeiros agredidos, aínda de baixa, que non se facía responsable destas agresións por ser servizos alleos, a pesar de ser o 061 quen os xestionou".
"O problema radica en que os profesionais TES -- técnicos de emerxencias sanitarias-- galegos non pertencemos ao Sergas, o que facilita que ante este tipo de episodios, o 061 mire para outro lado en lugar de condenar os feitos e implicarse na adopción de medidas para que estes non volvan repetirse", argumenta o sindicato.
Por iso, reclaman ser considerados "autoridade sanitaria" e aseguran que, por non selo, as agresións que sofren "non se consideran atentado contra a autoridade". "É insultante que vaiamos realizar o noso traballo e a administración non nos ampare nos nosos dereitos como profesionais sanitarios", apostilan desde a central sindical, que aseguran que a condición de "autoridade sanitaria" si existe noutras autonomías.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.