Condenan a Audasa a devolver o 50% da tarifa das peaxes a 21 usuarios polas obras da ponte de Rande
Por Europa Press / Redacción | SANTIAGO DE COMPOSTELA | 03/11/2022 | Actualizada ás 13:53
Autoestradas do Atlántico (Audasa) terá que devolver o 50% do importe da tarifa que cobrou en concepto de peaxe a 21 persoas físicas e xurídicas durante as obras da ponte de Rande, entre 2015 e 2018.
Así, recoñécese que as obras "impediron un correcto servizo ás persoas usuarias da autoestrada", segundo dispuxo o Xulgado de Primeira Instancia Nº12 da Coruña. O xuíz considera probado que as obras efectuadas no tramo entre as ligazóns de Cangas e Teis, incluída a reforma da ponte de Rande, fixeron que Audasa "non prestase o servizo en idénticas condicións ás que se presta cando non hai obras", segundo indica nun comunicado o despacho de avogados Xoán Antón Pérez-Lema, que está a cargo da defensa legal dos demandantes.
A sentenza recolle que o propio informe pericial facilitado por Audasa recoñece que se adoptaron restricións na circulación normal e que levaron a cabo acciones puntuais sobre o tráfico.
Ademais, sinala que, en contra do criterio de Audasa, as persoas demandantes non contaban con ningunha alternativa de circulación á autoestrada, xa que os itinerarios posibles implicaban tempos de desprazamento aínda máis lentos que a propia vía de pago en obras.
CONTRAVINO TERMOS DO SERVIZO
Aínda que a demanda presentada en defensa das persoas afectadas reclamaba a devolución íntegra das tarifas cobradas, a sentenza recoñece que a devolución íntegra dos importes pagos pola peaxe durante as obras "rompe o equilibrio das contraprestacións dos contratantes".
Deste xeito, a pesar de que Audasa tentou escudarse na súa incapacidade legal para reducir o importe da peaxe, a sentenza considera contravino os termos do servizo e acepta a rebaixa do 50% no importe a devolver por cada traxecto.
A sentenza non é firme e cabe recurso de apelación ante a Audiencia Provincial da Coruña.
