Os equipos de Viogen da Garda Civil e o Burela Fútbol Sala, entre outros, reciben o Premio Meninas 2022
A xornalista Cristina Huete recibirá unha mención honorífica pola súa labor xornalística.
Por E.P. | SANTIAGO DE COMPOSTELA | 20/11/2022 | Actualizada ás 13:48
Os equipos Viogen de Galicia da Garda Civil, a Asociación de Profesionais dos Centros de Información á Muller-Asocim, o equipo feminino do Burela Fútbol sala, o Comando de Igualdade do IES Alexandre Bóveda de Vigo e a Marcha Mundial das Mulleres recibirán este luns o Premio Meninas 2022, que recoñece a persoas e institucións que incorporasen estratexias, iniciativas ou proxectos para combater a violencia sobre as mulleres e promover a igualdade.
O acto, que estará presidido polo delegado do Goberno en Galicia, José Miñones, celebrarase no Hostal dos Reis Católicos a partir das 19,30 horas e contará coa presenza de responsables institucionais, membros xudiciais, da seguridade pública e distintos colectivos feministas e de defensa.
Nunha nota de prensa, a Delegación explicou que este acto abre a semana conmemorativa do 25 de novembro, Día Internacional contra a Violencia de Xénero.
Así, José Miñones recalcou a importancia do compromiso e a unión de todas as forzas e ámbitos sociais. Ademais, recoñeceu o valor dos galardoados, que son o "mellor exemplo" de como a sociedade galega alza a voz en contra da violencia machista e as desigualdades de xénero.
MENCIÓN HONORÍFICA
Esta edición engadiuse unha mención honorífica a medios de comunicación, que ten como obxectivo recoñecer o labor de xornalistas e empresas de comunicación que se significan na tarefa de loita contra a violencia de xénero, tanto na sensibilización como no rigor informativo do seu tratamento.
Nesta primeira ocasión, o galardón recoñece o traballo da xornalista ourensá Cristina Huete Vales polo seu "compromiso coa igualdade e os dereitos das mulleres".
Ademais, este luns tamén recibirán mencións honoríficas outros organismos e entidades. Os recoñecidos son: a Unidade de Atención á Familia e Muller da Policía Nacional da Coruña (UFAM), a Unidade Contra Redes de Inmigración Ilegal e Falsidade Documental (Ucrif) da Comisaría Local de Vigo, a maxistrada titular do Xulgado de Instrución número 1 de Santiago de Compostela, Ana López-Suevos, e a asociación Esmar Non á Violencia.
