O PP de Pontevedra pide axudas para comerciantes e hostaleiros ante o atraso do aceso das luces de Nadal

O Partido Popular de Pontevedra pide unha liña de axuda municipal para os gastos de comerciantes e hostaleiros derivados do atraso do aceso das luces de Nadal. A proposta foi presentada este venres polos concelleiros populares Rafa Domínguez e Pepa Pardo no transcurso dunha visita que o grupo municipal fixo a varios dos comerciantes e hostaleiros da cidade.

O portavoz popular, Rafa Domínguez, avanzou que o PP proporá no próximo pleno a creación desa liña de axuda a través da cal o Consistorio asumiría "os gastos que terán os traballadores derivados deste atraso inxustificable".

Para o PP é "necesario" que a corporación municipal mostre o seu "apoio unánime" aos comerciantes e hostaleiros de Pontevedra, "que se viron prexudicados por este apagamento inxustificado".

Pepa Pardo explicou que propoñen que o Concello "subvencione parte dos gastos que tiveron que asumir os días en que as luces de Nadal debían estar a funcionar: do 6 ao 16 de decembro, ambos os días incluídos".

Para os populares, a iluminación do Nadal "supón un motor económico e social das cidades" xa que "favorece a afluencia de turistas e visitantes, ademais de potenciar o crecemento económico da cidade".

É por iso que o PP defendeu esta proposta como "un claro exemplo dinamizador da economía local".

Sobre o contrato municipal "aínda sen asinar" coa empresa que se encargará de instalar a iluminación do Nadal, Pardo explicou que os pregos recollen que as luces deben estar instaladas e con posibilidade de funcionar antes do 6 de decembro, algo que dubida de que "se cumpra".

Neste sentido, preguntouse: "Que vai pasar coa partida de 139.000 euros se non imos ter luces durante os días que se recollen nos pregos?".