O 86 % dos compoñentes precisos para armar as furgonetas eléctricas de Stellantis chegarán a Reino Unido por mar dende Vigo
A factoría viguesa porá en marcha no verán de 2023 unha nova ruta marítima para transportar compoñentes que ensamblará na súa planta de Ellesmere Port
Por Europa Press / Redacción | VIGO | 12/12/2022 | Actualizada ás 15:33
A factoría viguesa da compañía automobilística Stellantis porá en marcha no verán de 2023 unha nova ruta marítima para transportar desde a cidade olívica ata Reino Unido o 86 % dos compoñentes das furgonetas eléctricas que a empresa ensamblará na súa planta de Ellesmere Port.
Tal como informou o director de Stellantis Vigo, Ignacio Bo, nun escenario de gran volume de produción de vehículos comerciais lixeiros, a compañía lanzará este novo fluxo de aprovisionamento, que levará pezas fabricadas en Vigo e a súa área ata Reino Unido, onde as instalacións de Ellesmere Port montarán 51.000 unidades destes automóbiles ao ano.
En concreto, o 86 % dos compoñentes destes vehículos chegarán desde Vigo. Con eles produciranse modelos das marcas Vauxhall, Opel, Puegeot e Citroën. O servizo loxístico integral, porta a porta, será prestado pola compañía Suardíaz, que transportará 14.700 tráilers ao ano con dous traxectos semanais.
A través desta ruta, Stellantis Vigo enviará a Ellesmere Port 47 referencias de pezas de chapa, que representarán o 83 % da carrozaría dos vehículos, mentres que os provedores implantados na Península Ibérica fornecerán o 86 % dos compoñentes cos que se montarán estes automóbiles.
En concreto, o 50 % das pezas será expedido por provedores implantados en Galicia, un 24 % por subministradores de Portugal e un 12 % por empresas situadas no resto de España. Así, ata 16 empresas instaladas en Galicia xerarán con esta subministración un volume de negocio anual de máis de 150 millóns de euros.
"Coas pezas de chapa e os compoñentes recibidos desde Vigo, Ellesmere Port ten previsto fabricar 51.000 unidades ao ano dos comerciais lixeiros das marcas Vauxhall, Opel, Peugeot e Citroën, na súa versión eléctrica, principalmente para abastecer ao mercado británico, sumándose esta produción á que realizan as plantas de Vigo e Mangualde (Portugal)", reivindicaron desde Stellantis.
REDUCIÓN DE EMISIÓNS
Neste senso, Ignacio Bo puxo en valor esta alternativa de transporte, que permitirá un aforro do 30 % das emisións de dióxido de carbono (CO2) se se compara coa realización da ruta por estrada.
Ademais, indicou que se porá en marcha o próximo verán, cando a produción xa iniciase na devandita cidade próxima a Liverpool, arribando as pezas a 10 minutos da fábrica.
Juan Riva, presidente de Suardíaz, deu as grazas a Stellantis por contar coa súa empresa para este "fito histórico". Para levar a cabo o servizo, explicou que utilizarán dous buques, un deles con capacidade para transportar tamén coches xa ensamblados.
Riva engadiu que nun principio este traxecto só será utilizado polos provedores de Stellantis, pero cando estea consolidado espera que poida transportar máis produtos.
O presidente do Cluster de Empresas de Automoción de Galicia (Ceaga), Roberto Cavallo, mostrou a súa satisfacción por este servizo, que permitirá aumentar as exportacións do sector cara a Reino Unido, cun volume de negocio de máis de 150 millóns.
Na mesma liña falou o presidente da Autoridade Portuaria de Vigo, Jesús Vázquez Almuiña, quen valorou o acordo entre Stellantis e Suardíaz e puxo á súa disposición a terminal viguesa para poder adaptarse ás necesidades desta nova ruta.
