O Parlamento galego, con votos do PP, pide ao Goberno reactivar o sistema do Observatorio de Prezos de Alimentos

A Comisión 8ª de Pesca e Marisqueo do Parlamento de Galicia aprobou este martes unha proposición non de lei do Grupo Popular para demandar á Xunta que pida ao Goberno central que reactive o sistema de información pública relativo aos datos de prezos do Observatorio de Prezos dos Alimentos, adscrito ao Ministerio de Agricultura, Pesca e Alimentación.

Foi a deputada do PP Teresa Egerique a encargada de defender esta iniciativa, quen lamentou que a gran inflación que sofre España na actualidade está "a sangrar" os petos dos cidadáns. Esta situación está a provocar, ademais, unha baixada do consumo de peixe.

Egerique lembrou que a equiparación das rendas de agricultores, gandeiros e pescadores cos demais sectores de actividade económica é un mandato constitucional. Para manter unha estabilidade nestas rendas é necesario que non se produzan fortes oscilacións que distorsionen a relación oferta-demanda, "a cal prexudica seriamente tanto a produtores como consumidores".

Por todo iso ve necesario que o Executivo reactive o sistema de información pública de prezos de alimentación do Observatorio, xa que permite aos profesionais dispor dos datos que precisan.

Con todo, Patricia Otero, do PSdeG, criticou esta iniciativa do PP, xa que indicou que o Executivo xa actualiza cada semana os prezos almacenistas. "Non se decatan de nada con tal de tirar dardos contra o Goberno central", lamentou Otero.

Na mesma liña falou Daniel Castro, quen dixo que están claras "as intencións" con esta proposición non de lei, utilizada como "arma" para "criticar e tensionar". A pesar diso, subliñou que é importante dispor desta información o máis actualizada posible.

A proposición non de lei foi aprobada cos votos a favor do PP, a abstención do BNG e a negativa do PSOE.

Peixe recén capturado | Fonte: Arquivo E.P.