'O Carrabouxo' celebra 40 anos cunha exposición en Ourense

Desde este venres e ata finais do mes de xaneiro o Pazo Provincial de Ourense acolle a exposición '40 anos do Carrabouxo', unha mostra que celebra as catro décadas desta figura do cómic galego que o seu autor, Xosé Lois González, publica no diario La Región desde o 10 de novembro de 1982.

"É moi grato celebrar corenta anos de Carrabouxo e facelo aquí, no Pazo Provincial", celebrou o presidente provincial, Manuel Baltar, no acto de presentación no que estivo acompañado polo director do xornal, Xosé Pastoriza, o propio autor das viñetas, Xosé Lois González, e o delegado da Xunta en Ourense, Gabriel Alén.

Baltar enxalzou que son máis de 14.500 as viñetas que Xosé Lois González realizou ao longo destes 40 anos "e aínda así segue conseguindo sorprender, facer da retranca unha arte e crear este milagre, este símbolo de Ourense", destacou en referencia á figura do Carrabouxo, salientando que o seu autor "comunica como ninguén, encaixando dun modo directo coa filosofía da xente".

O autor describiu a súa obra como "un veciño de Ourense, que vive en La Región, e que se fixo maior a través dos libros de recompilación publicados estes anos a través da Deputación", o que lle permitiu "almorzar cada día con miles de ourensáns".

A exposición está no primeiro andar do Pazo Provincial, onde habitualmente colgan os retratos dos expresidentes do organismo provincial e dos autores ourensáns que reciben galardóns no Día das Letras Galegas.

A mostra percorre así as catro décadas a través dunha viñeta seleccionada polo autor por cada un dos anos publicados, desde 1982 ata este 2022, ademais doutros aspectos da produción plástica de Xosé Lois González.

A mostra está aberta ao público ata finais de xaneiro, de 09,00 horas a 14,30 e de 17,00 a 19,30 horas, de luns a venres.