Por Europa Press / Redacción | SANTIAGO DE COMPOSTELA | 28/12/2022 | Actualizada ás 11:14
O Servizo Galego de Saúde (Sergas) notificou este mércores catro novos falecidos con covid-19 na área sanitaria de Vigo. No entanto, os casos activos da enfermidade mantéñense á baixa por segundo día consecutivo, ata alcanzar os 1.940, mentres que tamén diminúen os hospitalizados, a 255.
En canto aos mortos, correspóndense coa xornada do luns, 26 de decembro. Trátase dunha muller de 95 anos e de tres homes de 85, 89 e 92, todos eles con patoloxías previas. Con este catro óbitos, a listaxe oficial de vítimas da pandemia en Galicia elévase a 4.012.
No que respecta aos casos activos, é dicir, persoas que están a pasar a covid-19, encadean a súa segunda xornada de descenso ata situarse nos 1.940, que son 35 menos que os notificados polo Sergas o martes.
Esta diminución é desigual en función das áreas sanitarias. Así, os pacientes covid diminuíron nas últimas horas nas áreas de Vigo, a 367 (-22), Santiago-Barbanza, a 252 (-18), e Ourense-Verín-O Barco de Valdeorras, a 225 (-9).
Mentres tanto, na de Lugo-A Mariña-Monforte os casos activos mantivéronse en 205, sen variación; e subiron lixeiramente na da Coruña-Cee, a 512 (+2), Pontevedra-O Salnés, a 209 (+4), e Ferrol, a 169 (+9).
Todo iso nunha xornada na que o Sergas notifica 173 novos positivos nun día. A maioría concéntranse nas áreas da Coruña (45), Vigo (31) e Ferrol (26). Seguen a estas Pontevedra (20), Lugo (19), Santiago (16) e Ourense (16).
No que respecta aos hospitalizados con covid-19, reducíronse lixeiramente nas últimas horas, ata os 255, tres menos. En concreto, son 251 en planta (+1) e catro en unidades de coidados intensivos (-4).
Por áreas sanitarias, a da Coruña mantense sen cambios con 83 ingresados infectados por coronavirus, igual que a de Lugo, con 22. Con todo, os hospitalizados crecen na de Ferrol, a 30 (+4), e na de Pontevedra, a 25 (+1). No lado oposto sitúanse as de Vigo, onde baixan a 36 (-4); Santiago, a 31 (-2); e Ourense, a 28 ingresados (-2).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.