Xesús Carro, sacerdote e arqueólogo, nova incorporación ao Álbum de Galicia do Consello da Cultura Galega

A biografía do arquéologo e sacerdote nado en Santiago de Compostela Xesús Carro é a última incorporación ao Álbum de Galicia, creado polo Consello de Cultura Galega, en recoñecemento por ser o pioneiro nos estudos xacobeos e a súa axuda para transcribir o códice calixtino.

Na biografía, asinada por Adrián Estévez, ofrécese toda a produción divulgativa e investigadora ao redor desta figura que formou parte do Seminario de Estudos Galegos e foi nomeado fillo predilecto de Santiago de Compostela dous anos antes do seu falecemento, en 1973.

Este Álbum foi presentado en xaneiro de 2020 e consiste nunha colección dixital de biografías de persoas destacadas en diversos ámbitos: sociedade, cultura, ciencia ou empresa. As últimas incorporacións, á parte de Xesús Carro, son as biografías de Chichi Campos, Luís Rey, Marcos Valcárcel e Agustín María Acevedo.

A idea desta colección é dar visibilidade a numerosas persoas ilustres, xa falecidas, que dalgunha forma han contribuído á sociedade galega e que, con todo, seguen sendo grandes descoñecidos para o público de todas as idades.

A día de hoxe conta con máis de 600 entradas que permiten conecer a vida a obra e a produción intelectual das persoas divulgadas. Así mesmo, as biografías están enriquecidas con material documental, referencias bibliográficas e contidos multimedia.

XESÚS CARRO

Nacido en 1884, foi nomeado presbítero en 1909 e estivo destinado na colexiata de Santa María do Sar. Posteriormente, colaborou con Sociedade de Amigos do País e alí foi nomeado para a creación dunha sección de historia e arqueoloxía galega, especialidade á que se afeccionou durante os seus estudos no Seminario.

Neste sentido serviu de ligazón entre os historiadores autóctonos e estadounidenses, chegando a axudar a Walter Muir Whitehill na súa transcrición do Códice Calixtino.

En 1928 ingresou no Seminario de Estudos Galegos, onde dirixiu a sección de arqueoloxía e arte. Desde este posto redactaba destacadas artigos sobre a Catedral de Santiago para a revista 'Nós'.

"Despois do golpe de estado de 1936 procurou salvar material da editorial Nós e do Seminario de Estudos Galegos, como algunhas láminas con miniaturas do Códice Calixtino", subliña Adrián Estévez na súa entrada.

Tamén formou parte do Instituto de Estudos Medievais e foi membro correspondente da Real Academia de Historia de San Fernando. O seu último recoñecemento foi o de ser nomeado fillo predilecto de Santiago de Compostela en 1971, cidade na que faleceu dous anos despois.