Rosendo Fernández considera que Villarino está "desesperado" despois do arquivo da querela

O vicepresidente da Deputación de Ourense acusa a Villarino de "tentar venderse como vítima dunha conspiración creada por el mesmo".

Por Europa Press / Redacción | OURENSE | 11/01/2023 | Actualizada ás 20:58

Comparte esta noticia

O Deputado Popular e vicepresidente da Deputación de Ourense, Rosendo Fernández, cargou este mércores contra o socialista Rafael Rodríguez Villarino, ao que considerou "desesperado por un minuto de protagonismo mediático", tras o arquivo da querela por un posible delito de prevaricación pola denegación da posibilidade de compatibilizar o seu cargo co seu labor no posto de profesor do campus da Universidade de Vigo en Ourense.

O xulgado fixo pública leste mesmo mércores a súa decisión de sobreseer e arquivar esta causa, que se abriu por mor dunha querela interposta polo portavoz socialista contra o presidente da Deputación, Manuel Baltar, e os portavoces, no ano 2020, do Partido Popular, Rosendo Fernández, e de Democracia Ourensana, Miguel Caride

Na sentenza, o xuíz determina que "aínda admitindo" que o voto emitido polos deputados "teña por obxectivo castigar a conduta belixerante do querelante", iso "non os converte en acredores dunha sanción penal" porque o voto "é defendible desde un punto de vista xurídico".

Así mesmo, sinala como "significativo" o feito de que a querela non se dirixe contra todos os deputados provinciais que votaron en contra da compatibilidade, senón "unicamente contra o presidente da institución e os portavoces de PP e DO", o que leva a concluír que "se utiliza como un instrumento de vendetta política".

Tras coñecer esta decisión, o deputado Rosendo Fernández sinalou que o arquivo da causa "retrata" ao portavoz socialista como "un home desesperado por tentar conseguir o seu minuto de protagonismo mediático". Ademais, lembrou que os populares xa defenderon no seu momento "o que agora conclúe o xuíz, que esta manobra non foi máis que un torpe intento de vendetta política".

Nesta mesma liña, Fernández considerou que o socialista buscaba "gañar un minuto de repercusión" para "salvar a súa presenza nas listas dalgún concello despois de ser defenestrado polo seu propio partido" ao elixir outro candidato para as municipais na cidade.

Así, di o vicepresidente primeiro da institución provincial ourensá que a denuncia é "tan triste como inútil" e "ilustra perfectamente" a forma de concibir a política do socialista, a quen acusa de "tentar venderse como vítima dunha conspiración creada por el mesmo". Algo que, engade Fernández, "xa é costume daqueles tempos en que vía ovnis nos ceos do Concello de Amoeiro".

O portavoz popular na Deputación termina celebrando que "afortunadamente parece que os tempos de Villarino son pasado" e asegura que "é perfectamente comprensible" que, desde as propias estruturas internas do Partido Socialista de Galicia, "deixasen de confiar nun home sen criterio, sen partido e sen concello".

Rosendo Fernández. DEPUTACIÓN DE OURENSE
Rosendo Fernández. DEPUTACIÓN DE OURENSE

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta