"Monte Toural", tercer parque eólico paralizado polo TSXG

O TSXG acordou por medio dun Auto con data 16 de decembro a paralización cautelar do parque eólico “Monte Toural”, tal como fixera co “Campelo” e o “Bustelo”, os tres de Greenalia. A asociación ecoloxista ADEGA e a PDCC (Plataforma en Defensa de la Cordillera Cantábrica) interpuxeron os correspondentes contenciosos contra as autorizacións da Xunta a estes tres parques, solicitando tamén a súa paralización cautelar.

“O Tribunal dá novamente a razón ADEGA e a PDCC e acorda paralisar tamén o “Monte Toural”” sinalan desde ADEGA. Esta paralización faise en aplicación do principio de precaución e pola preminencia do medio ambiente sobre outros intereses, sobre todo os da promotora.

Por outra parte, o TSXG non impón ningunha caución económica a ADEGA e á PDCC malia a que Greenalia o solicitou, aducindo perdas duns 12 millóns de €. Cómpre lembrar tamen que as caucións impostas no caso dos outros dous parques (10.000 € en cada caso), foron finalmente levantadas polo Tribunal ao aceptar os recusos de ADEGA e a PDCC. Ademais, o TSXG impón neste auto o pago de custos a Greenalia e á Xunta.

XUNTA E GREENALIA, NOVAMENTE DESAUTORIZADAS POLO TSXG

As consideracións das partes demandadas, Xunta e Greenalia son practicamente idénticas, e baséanse, entre outros argumentos, no interese público de desenvolver as enerxías renovables e na inexistencia de danos irreparables aos hábitats e especies afectadas. Porén, Xunta e empresa recoñecen impactos sobre hábitats (dous humidais catalogados) e especies protexidas, incluídas algunhas endémicas e en perigo de extinción (Lycopodiella inundata, Euphorbia uliginosa, e Centaurea ultreiae, entre outras).

O Tribunal destaca a necesidade de aplicar os principios de prevención e precaución pola "relevancia excepcional" do espazo natural protexido (humidal inventariado -Lagoa Alcaián- e paisaxe protexida) e das especies en perigo cocreto de extinción, "unha delas endémica e en perigo crítico". Tamén di que a simple existencia de medidas correctoras non garante que non se produza un dano irreparable.

Portanto, o Auto indica que existindo risco de dano certo e recoñecido sobre hábitats e especies se as obras se inician, imponse a necesidade de protexer este ben xurídico superior, o medio ambiente, sobre calquera outro beneficio.

XUNTA

Respecto a esta paralización, o vicepresidente primeiro e conselleiro de Economía e Industria, Francisco Conde, salientou que a Xunta está "actuando de forma rigorosa" nas declaracións de impacto ambiental (DIA) dos novos parques eólicos. "Neste sentido seguro que hai unha gran diferencia entre a Xunta e o Goberno central", suliñou.

Así, en resposta a Galicia Confidencial na rolda de prensa posterior ao Consello da Xunta, Conde destacou que o Executivo de Pedro Sánchez vai permitir ata decembro de 2024 que se aproben parques sen que presenten a pertinente DIA. "E nós si que a pedimos", salientou.