A Deputación de Ourense busca ferramentas para dar unha resposta "máis áxil e eficaz" en situacións de emerxencia
O proxecto da senda termal entre Ribadavia e as termas de Prexigueiro, que terá 5 quilómetros, entra en fase final de redacción
Por E.P. | SANTIAGO DE COMPOSTELA | 23/01/2023 | Actualizada ás 17:27
A Xunta de Goberno da Deputación de Ourense aprobou este luns unha proposta de cooperación cos concellos para avanzar no deseño dunha nova ferramenta de colaboración interadministrativa, que canalice unha resposta "aínda máis áxil e eficaz" ante situacións de emerxencia ou catástrofes, nesta ocasión enfocada nas necesidades dos afectados polas inundacións.
Segundo indicou a institución provincial nun comunicado, o deseño do plan EmergOU busca achegar a maquinaria e persoal necesaria para a reparación dos danos sufridos, achegar equipos técnicos de avaliación para estudar a petición de axudas e un comité de traballo para analizar accións que mitiguen os efectos de futuras incidencias.
Deste xeito, a iniciativa está perfilada co obxectivo de atender ás necesidades dos concellos e veciños dunha maneira "tan eficiente como coordinada" co resto de administracións implicadas.
Ademais, durante esta reunión aprobouse a concesión de case 305.000 euros en subvencións a concello e entidades. Deste importe total, 47.000 euros irán destinados ao mantemento de parques e xardíns en Rairiz de Veiga. Así, case 8.000 á adquisición dun vehículo eléctrico para o Concello de Monterrei, mentres que o Club Ourense Baloncesto contará con 250.000 euros para a tempada 2022-2023.
SENDA TERMAL ENTRE RIBADAVIA E PREXIGUEIRO
Noutra orde de asuntos, o presidente da Deputación, Manuel Baltar, acompañado do vicepresidente segundo e responsable da cooperación cos concellos do Ribeiro, César Fernández, visitou a zona pola que transcorrerá o carreiro termal que unirá o centro histórico de Ribadavia coas termas de Prexigueiro, e cuxo Plan Director se atopa na fase final de redacción.
Segundo indicou a Deputación nunha nota de prensa, esta actuación, que constitúe o concepto de "carreiro termal" e sitúase no marco do Plan de Sostenibilidade Turística (PST) 'Ourense Termal', busca "mellorar a conectividade entre ambas as localizacións, recuperar puntos degradados da paisaxe e ofrecer un produto complementario que aumente a atracción turística".
Esta senda terá percorrerá un cinco quilómetros, dos que só a metade son transitables na actualidade. Así, o proxecto tamén recolle a recuperación de certos tramos do antigo camiño medieval, co obxectivo de pór valor os vestixios históricos.
