Os supostos "empadroamentos masivos" do PP en Castrelo de Miño chegan á Fiscalía

O Partido Socialista de Castrelo de Miño denunciou ante a Fiscalía Provincial de Ourense unha serie de "empadroamentos masivos" que atribúe ao PP neste municipio, actualmente gobernado polos populares.

Os socialistas presentaron un escrito no que piden que a Fiscalía acorde a incoación das dilixencias de investigación "convenientes para depurar as responsabilidades penais cometidas polos membros da Xunta de Goberno Local do Concello".

Explican que no escrito presentado en relación ás altas no padrón municipal realizadas nos dous últimos meses atoparon "numerosas irregularidades", e neste sentido trasladaron a este órgano "os empadroamentos masivos" en casas "pechadas e inhabitables" de "os edís do goberno, do rexedor municipal, así como en vivendas de familiares directos dos mesmos" que para os socialistas "non dispoñen de autorización do propietario nin contrato de aluguer ou recibo que o xustifique".

Así mesmo, tamén puxeron o foco nas persoas que non residen o mínimo de 180 días esixido, nos empadroamentos de "varias persoas sen relación entre elas nunha mesma vivenda" e en empadroamentos "con autorización de persoas que non son propietarios da vivenda que en teoría se ocupa".

"Estamos ante uns feitos extremadamente graves polos que esperamos que a Fiscalía tome nota do escrito para proceder a investigar estas irregularidades no padrón do noso municipio", esgrimiu a portavoz socialista en Castrelo de Miño, Catalina González, que ademais resalta o caso da aldea de Covelas onde asegura que "hai catorce persoas empadroadas en dúas casas sen ningún tipo de relación entre si".

Reunion Manuel Baltar (Presidente da Deputación de Ourense) con Avelino Pazos Pérez, alcalde de Castrelo de Miño | Fonte: DEPUTACIÓN DE OURENSE