Reivindicando ás mulleres que tamén rin e fan rir
'Cómicas, habelas hainas', un espectáculo de humor que reivindica ás mulleres do oficio.
Por Europa Press / Redacción | SANTIAGO DE COMPOSTELA | 17/02/2023 | Actualizada ás 13:35
O espectáculo 'Cómicas, habelas hainas', coordinada pola actriz viguesa Xasmín Abuín, chega á programación cultural da Deputación de Pontevedra como unha "innovadora proposta" coa que esperan "potenciar o papel das mulleres" do oficio do humor na provincia.
A presidenta da Deputación de Pontevedra, Carmela Silva, presentou este venres a que constitúe "unha das grandes novidades da programación cultural". Do 4 de marzo ao 12 de maio, a Deputación de Pontevedra levará por todas as comarcas da provincia a comedia feita e protagonizada por mulleres, con dez monólogos en vivo a cargo de Xasmín Abuín, Arantxa Treus, Marta Doviro, Bianca Kovacs, Coria Castelo e Bárbara Grandío.
A presidenta provincial destacou que, desde o Goberno provincial "seguimos apostando pola igualdade e por levar a cultura a todo o territorio", convencidos de que "non hai un elemento de transformación social como a cultura".
Carmela Silva incidiu en que, con esta iniciativa, "van romper cos prexuízos que aínda hoxe moitas cómicas, especialmente en Galicia, sufrindo", xa que "tamén o humor segue sendo un terreo maioritariamente masculino e non precisamente por falta de profesionais ou talento".
