Rueda subliña que eles sempre tiveron "moitísimo coidado" en que a eólica mariña fora comparible coa pesca
O goberno galego volve censurar que o Ministerio non contou coa súa "opinión" a pesar da "enorme oportunidade" desta actividade
Por Europa Press / Redacción | VIGO | 28/02/2023 | Actualizada ás 15:22
O presidente da Xunta, Alfonso Rueda, advertiu este martes de que o goberno galego non autorizará "ningún parque eólico mariño que poña en risco os recursos pesqueiros" e volveu a lamentar que o Goberno central elaborou unha ordenación do espazo marítimo sen contar coa opinión de Galicia.
En declaracións aos medios tras participar nun acto en Mos (Pontevedra), o titular do Executivo galego constatou que a aprobación desa ordenación, no Consello de Ministros deste martes, chegou "con atraso" e anunciou que a Xunta a estudará porque "parece que non vai moito máis alá" da delimitación de zonas, sen avanzar "cando se convocarán os concursos nin en que condicións".
En todo caso, o presidente galego advertiu de que a Xunta non autorizará "ningún parque eólico mariño que poña en risco os recursos pesqueiros" e lamentou que Galicia non fose consultada na elaboración dunha norma para regular unha actividade que "interesa moitísimo" pola "enorme oportunidade" que pode supor para a Comunidade.
Respecto diso, subliñou que a administración galega sempre puxo "moitísimo coidado" en asegurar que as actuacións no mar fosen compatibles coa actividade pesqueira, e mesmo se creou un Observatorio da Eólica Mariña con representantes dos sectores afectados, para que "puidesen ter voz e estar informados".
"Esa información nunca chegou, e agora o Goberno descólgase con esta delimitación. Sería máis útil e eficaz haber ido tendo a información, acordar isto entre todos", sinalou Alfonso Rueda.
Segundo engadiu, para o goberno galego "é fundamental" que a actividade eólica mariña preserve os recursos e o medio ambiente (e lembrou que, de feito, "moitos" parques eólicos en terra foron denegados por motivos ambientais por parte da administración autonómica), e sinalou que "se poden compatibilizar as dúas cousas". "Se nos preguntaron, dariamos a nosa opinión, pero non se nos preguntou e agora imos ver o resultado. Daremos a nosa opinión e, se hai que rectificar algo, espero que se rectifique", proclamou.
O presidente da Xunta trasladou a súa esperanza de que, "a partir de agora si haxa cogobernanza", algo do que "lle gusta moito falar ao Goberno, pero que non existe", e pediu que si haxa esa cooperación porque Galicia ten unha "enorme oportunidade" en materia de eólica mariña.
SECTOR DO MAR "MOI PREOCUPADO"
A conselleira de Medio Ambiente, Territorio e Vivenda, Angeles Vázquez, tamén se referiu este martes á ordenación aprobada en Consello de Ministros, e recalcou que "polo momento" a Xunta "descoñece como vai quedar ese mapa" de eólicos pero que, en todo caso, ten ao sector do mar "moi preocupado".
Vázquez insistiu en acusar o Ministerio para a Transición Ecolóxico de "falta de diálogo e de consenso" tanto co sector como coas comunidades autónomas, posto que o departamento de Teresa Ribeira non contestou "ningunha" das alegacións remitidas desde Galicia.
"É bo, é san, é democrático e debe ser así, participativo, facer o mesmo que se está facendo en Galicia coa lei de ordenación do litoral. Nós vemos todas as alegacións, facémolo público e somos transparentes, e esa transparencia é a que reivindicamos unha e mil veces por parte do Ministerio", afirmou a conselleira.
Neste contexto, Angeles Vázquez apelou a facer as cousas "ben". "Por unha banda temos enerxía, pero por outro temos que conservar e preservar a biodiversidade mariña e a economía en relación ao mar", sentenciou.
