Bugallo defende o "esforzo" durante o seu mandato e a oposición lamenta "promesas incumpridas"

O alcalde de Santiago, Xosé Sánchez Bugallo, compareceu este martes no pleno do Concello da capital galega a petición de Compostela Aberta (CA) para dar conta do grao de cumprimento do seu programa electoral durante o seu mandato. Así, o rexedor defendeu "o esforzo" do goberno compostelán, mentres que a oposición lamentou as "promesas incumpridas" en moitos ámbitos, especialmente en materia de infraestruturas.

En concreto, a portavoz de CA, María Rozas, reivindicou que foi a súa formación a que "desbloqueou" infraestruturas pendentes como a Intermodal ou a Edar. "Se Santiago ten esas infraestruturas é grazas a un goberno de Compostela Aberta e non de Bugallo", insistiu.

"PROXECTOS INCUMPRIDOS"

Pola súa banda, a portavoz do BNG, Goretti Sanmartín, reprochou a Sánchez Bugallo que o grao de cumprimento cos veciños de Santiago é "bastante baixo". Así, enumerou outros "proxectos incumpridos" como o grao de execución, a demora do pago a provedores, problemas de saneamento no rural ou falta de diálogo e de consenso e de participación cidadá.

Mentres, o portavoz do PP, José Antonio Constenla, asegurou que "resulta difícil" atopar "algo positivo" no Goberno local. Deste xeito, criticou os "contratos prorrogados" ou a "incapacidade para levar a bo termo as obras". "Os seus orzamentos foron un constante brinde ao sol", ironizou Constenla.

FOLGA SAF

Durante o pleno, os grupos da oposición tamén fixeron referencia á folga das traballadoras do Servizo de Axuda no Fogar da capital galega. Así mesmo, mentres se celebraba a sesión matinal do pleno, traballadoras deste servizo mobilizáronse ante o Pazo de Raxoi para denunciar servizos mínimos "abusivos" e "mala organización".

Posteriormente, ao mediodía, trasladaron as súas protestas a Área Central, onde están as oficinas da empresa concesionaria do servizo, a empresa Servisar.