A USC foi seleccionada para realizar a análise sanitaria das poboacións piscícolas dos ríos durante 20 meses
O obxectivo desta tarefa é prestar un servizo de avaliación de risco con análises periódicas a través de mostras obtidas destes hábitats.
Por E.P. | SANTIAGO DE COMPOSTELA | 05/03/2023 | Actualizada ás 18:28
A Universidade de Santiago de Compostela (USC) foi seleccionada pola Xunta para realizar a análise sanitaria das poboacións piscícolas dos ríos e dos centros ictioxénicos durante os próximos 20 meses.
Así o trasladou o goberno autonómico nun comunicado no que explicou as bases deste contrato, que conta cun orzamento de máis de 81.000 euros, un 75% do total financiado pola Unión Europea.
O obxectivo desta tarefa é prestar un servizo de avaliación de risco con análises periódicas a través de mostras obtidas destes hábitats para vixiar o estado sanitario e toxicolóxico destas poboacións e investigar posibles incidencias.
Nesta liña, avanza a Xunta, a función destes procesos de control será o diagnóstico de patoloxías de orixe bacteriana, vírica, fúngica ou parásita co fin de que sirvan de base para planificar e xestionar adecuadamente os riscos no medio natural.
