A Xunta acusa ao BNG dunha "campaña de ataque" que afecta "ao clima interno" na CRTVG
Os nacionalistas piden unha CRTVG que non estea "supeditada aos intereses do PP".
- Folga na CRTVG: "Isto é unha mecha que, como arda, non sabemos como vai a acabar"
- A CRTVG reduce o seguimento da folga ao 28% e destaca as diferencias entre traballadores e o comité de empresa
Por Europa Press / Redacción | SANTIAGO DE COMPOSTELA | 08/03/2023 | Actualizada ás 18:18
O vicepresidente segundo e conselleiro de Presidencia, Xustiza e Deportes, Diego Calvo, asegurou que a "constante campaña de ataque aos medios públicos" e de "permanente presión política" que leva a cabo o BNG é o que "está a afectar ao clima na CRTVG".
Así o manifestou este mércores no pleno da Cámara galega, onde deu resposta a unha pregunta formulada pola deputada do Bloque María González Albert, quen pediu ao Goberno galego que cumpra coa lei e substitúa á dirección xeral da CRTVG por estar "supeditada aos intereses do PP". Ademais, a nacionalista referiuse a a folga mantida por traballadores e denunciou "represalias e represión" contra o persoal coa escusa dunha suposta "reestruturación".
Respecto diso, Diego Calvo criticou que os nacionalistas acusen "sen pór encima nin un só dato" e asegurou que, fronte á posición "profundamente intervencionista" do BNG, a Xunta defende "uns medios públicos que funcionen con independencia e de acordo a criterios profesionais".
"Como cando teñen ocasión de controlar a TVG ou a Radio Galega así o fan, pensan que o resto facemos o mesmo pero non é certo", sostivo Diego Calvo, que se referiu a episodios ocorridos nos medios públicos durante o bipartito. "O vicepresidente da Xunta, Anxo Quintana, mandou unha carta ao director da TVG para que non fosen aos seus actos porque consideraba que non se atendían como debían ser atendidos... Mesmo Beiras dicía que os coroneis da UPG prohibíanlle ir á radio", sostivo.
Por último, subliñou que a Xunta respecta o labor do director xeral da CRTVG, así como a de todos os profesionais. Estas explicacións chegan días despois dunha folga que, segundo o propio ente público, tivo un seguemento dun 30% e condicionou a emisión de varios programas, tanto na TVG como na RG.
