Por Europa Press / Redacción | Santiago | 10/03/2023 | Actualizada ás 15:42
Os xulgados galegos recibiron o ano pasado 7.029 denuncias por violencia de xénero, un 12,3% máis que en 2021, cando se presentaron 6.259. A gran maioría (5.356) chegaron aos xulgados a través de atestados policiais con denuncia da vítima, segundo informa o Tribunal Superior de Xustiza de Galicia (TSXG).
De acordo cos datos achegados, aumentou tamén o número de mulleres que aparecen como vítimas, pois entre xaneiro e decembro contabilizáronse 6.926, fronte ás 6.219 de 2021, o que supón unha subida do 11,4 %. A taxa de violencia de xénero (mulleres vítimas por cada 10.000 mulleres) en Galicia situouse en 49,6, a segunda máis baixa do Estado -- cuxa media foi de 72,9-- , por detrás de Castela e León (46,8).
Os distintos órganos xudiciais (xulgados de violencia sobre a muller, xulgados do penal e audiencias provinciais) ditaron o ano en procesos de violencia de xénero 2.161 sentenzas, das cales 1.775, é dicir, o 82%, foron condenatorias.
Segundo os datos estatísticos feitos públicos hoxe polo Observatorio contra a Violencia Doméstica e de Xénero do Consello Xeral do Poder Xudicial (CGPJ), en Galicia descenderon un 25,5% os casos de vítimas que se acolleron á dispensa para non declarar. En 2022 optaron por esta decisión 351 mulleres, fronte ás 471 que o fixeron en 2021.
Ademais, o ano pasado solicitáronse ante os xulgados de violencia sobre a muller 1.882 ordes e medidas de protección da vítima, un 5,5% máis que en 2021, cando se demandaron 1.784. Delas, foron acordadas 1.267 (o 67,3%). Nos xulgados de garda sen competencia en violencia sobre a muller solicitáronse 463 ordes de protección, das que se acordaron 301.
XULGADOS DE MENORES
En 2022 os xulgados de menores axuizaron a doce persoas por delitos relacionados con violencia sobre a muller, dos cales nove casos finalizaron con imposición de medidas. Os datos relativos ás medidas civís ditadas polos xulgados de violencia sobre a muller para protexer aos fillos das vítimas, que reflicten as modificacións legais introducidas na Lei Orgánica de protección integral á infancia e a adolescencia fronte á violencia, reflicten que entre xaneiro e decembro os órganos xudiciais galegos adoptaron 144 medidas.
As mesmas consistiron na suspensión do réxime de visitas, máis do dobre que en 2021, cando se adoptaron 70. En total, o ano pasado rexistráronse 77 menores tutelados vítimas de violencia de xénero, fronte aos 56 de 2021, é dicir, un 37,5% máis.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.