As persoas con ELA poderán pedir a partir da próxima semana a axuda de 12.000 euros ao ano
Por E.P. | SANTIAGO DE COMPOSTELA | 30/03/2023 | Actualizada ás 18:46
O presidente do Goberno galego, Alfonso Rueda, anunciou este xoves que a partir da próxima semana publicarase xa no Diario Oficial de Galicia (DOG) a nova axuda para persoas diagnosticadas con Esclerose Lateral Amiotrófica (ELA), que consta dunha achega de 12.000 euros ao ano, con carácter retroactivo desde xaneiro.
Na rolda de prensa posterior á reunión semanal do Consello, o mandatario galego puxo en valor o feito de que Galicia será a primeira Comunidade que desenvolva unha medida "pioneira" como esta destinada aos pacientes dunha enfermidade progresiva, sen cura e altamente incapacitante. Para iso, explicou que se habilita un orzamento de 3,2 millóns de euros cos que axudar ás familias a facer fronte ao gran custo económico que supón este diagnóstico, xa que unha persoa con ELA pasa nuns meses de ser plenamente autónoma a ter unha gran dependencia.
O presidente da Xunta precisou que en Galicia hai máis de 250 persoas con Ela, e apuntou o feito de que cada ano se diagnostican 30 novos casos. Con esta axuda poderán facer fronte aos gastos máis básicos como a alimentación, o coidado ou a rehabilitación, e tamén outros de gran importancia como a compra de material sanitario, guindastres, cadeiras de rodas especiais ou camas articuladas.
Así mesmo, servirá para adaptar fogares para realizar, por exemplo, melloras de accesibilidade en baños ou dormitorios, así como para a colocación de elevadores ou ascensores; ou para a compra de vehículos adaptados.
A Xunta destacou que non é a primeira vez que Galicia se sitúa na vangarda neste ámbito, xa que en 2018 tamén foi pioneira ao crear o Proceso de asistencia integrado de Esclerose Lateral Amiotrófica. Ao amparo deste procedemento buscouse axilizar a atención das persoas con esta enfermidade. Así, establecéronse vías rápidas: a nivel sanitario, para axilizar o diagnóstico; e a nivel social, abrindo unha vía preferente para que as solicitudes de dependencia da ELA se tramiten en menos dun mes.
