Xa hai 70 locais adheridos como 'amigos dos cans' en Santiago
Guinarte sinala que os datos de turismo de Semana Santa que reflicten "que se está facendo ben o camiño á desestacionalización"..
Por E.P. | SANTIAGO DE COMPOSTELA | 11/04/2023 | Actualizada ás 13:28
O Concello de Santiago fixo balance este martes do primeiro ano da iniciativa de fomento do turismo 'Santiguau' á que xa se adheriron un total de 70 establecementos, entre aloxamentos, restaurantes e cafetarías que se definen como 'amigas dos cans'.
O concelleiro de Turismo, Sindo Guinarte, estivo acompañado durante a rolda de prensa, que tivo lugar no Pazo de Raxoi, da xerente de Santiago Turismo, Flavia Ramil, e a actriz, presentadora e escritora do libro 'O Canino de Santiago', Sara Escudero.
Guinarte fixo fincapé durante a súa intervención na importancia de "facer de Santiago un destino de turismo sustentable de alta rendibilidade", apuntando "a segmentos con valor engadido". Así, explicou que as persoas que viaxan con cans "pasan máis noites e teñen un gasto maior".
Deste xeito, Escudero, que levou a cabo nos últimos días o Camiño Primitivo, insistiu na idea de que "hai que sumar o sentido común dos donos co dos establecementos", para que máis locais formen parte de programa.
DATOS DE 'SANTIGUAU'
Pola súa banda, Flavia Ramil sinalou os resultados do primeiro ano do programa, cun apartado na web de Turismo Santiago que "xa supera as 4.500 visitas". Unha cifra que definiu como "moi boa", se "se ten en conta que é un sector concreto da poboación".
Nesta liña, detallou que dos 70 establecementos adheridos, "25 son aloxamentos, 34 restaurantes e 12 bares". Así, indicou que as persoas interesadas dispoñen doutro tipo de información como, por exemplo, "as posibilidades do transporte público".
CAMIÑO Á DESESTACIONALIZACIÓN
Doutra banda, Guinarte referiuse a os datos de turismo desta semana Santa que reflicten "que se está facendo ben o camiño á desestacionalización", o que "culmina a realidade e expectativa que se arrastran desde principio de ano". Nesta liña, subliñou que o Goberno local traballa co obxectivo de que "se alongue a estancia na cidade", así como de "fomentar a visita a outros lugares, como os espazos verdes".
