Tres persoas atendidas en Ourense logo de arder unha campá extractora

Tres persoas foron atendidas en Ourense despois de arder unha campá extractora por mor dunha pota que quedou ao lume, segundo informa o 112 Galicia.

Os tres feridos foron evacuados polo persoal do Servizo de Urxencias Sanitarias de Galicia-061 ao complexo hospitalario universitario de Ourense (CHUOU), por queimaduras e inhalación de fume.

Unha das persoas afectadas foi quen, ao fío das dúas deste mediodía, contactou co 112 Galicia para pedir axuda. Durante a comunicación mostraba estar moi nerviosa e indicaba que lle ardese a cociña, na rúa de Antonio Sáenz Díez, na cidade de Ourense. Aseguraba, ademais, que estaba ferida, que se queimou nun dedo e que a vivenda estaba chea de fume.

A partir de aí, os xestores do 112 pasaron aviso ao persoal sanitario, aos Bombeiros de Ourense, á Policía Local e Nacional e aos efectivos da Agrupación de Voluntarios de Protección Civil da cidade.

Unha vez no punto, os Bombeiros indicaron que, tras finalizar a extinción das chamas, procederon a ventilar a vivenda e o oco das escaleiras.

Así mesmo, sinalaron que a campá extractora ardeu por mor dunha pota que deixaron ao lume e como consecuencia, tres persoas resultaron afectadas e foron evacuadas polo persoal sanitario, aínda que o seu estado non parecía revestir gravidade.

Ambulancia do 061 | Fonte: Arquivo