Pillan a un condutor trasnportando media tonelada de ameixa sen documentación
A Garda Civil tamén se incautou de 68 quilos de polbo capturado nunha zona prohibida de Cangas
Por Europa Press / Redacción | VIGO | 02/05/2023 | Actualizada ás 16:35
A Garda Civil informou da aprehensión de máis de media tonelada de ameixa, que foi descuberta durante un control de tráfico no rexistro dun turismo con matrícula portuguesa e que se dirixía a Sanxenxo, sen ter documentación sobre controis ou procedencia do bivalvo.
Os feitos ocorreron o pasado venres, cando unha patrulla do destacamento de Tráfico de Vilaboa deu o alto a un turismo de matrícula portuguesa, ao decatarse de que levaba os asentos traseiros cubertos cunha lona escura.
Cando inspeccionaron o vehículo, comprobaron que na parte traseira acumulábanse 32 sacos de ameixa, 300 quilos de ameixa xapónica e 255 quilos de ameixa babosa. O condutor non achegou ningún documento para xustificar o transporte, nin sobre a procedencia, e o seu vehículo tampouco estaba acondicionado para levar este produto.
O condutor, veciño de Portugal, explicou aos axentes que as almeixas proviñan da zona de Aveiro (Portugal) e que as levaba a Sanxenxo (Pontevedra). Os garda civís puxeron os feitos en coñecemento do Servizo de Inspección Pesqueira da Xunta de Galicia, que se fixo cargo do produto. Así mesmo, levantouse acta de denuncia por carecer de guía de transporte e por levar as ameixas nun espazo non adecuado.
Tamén se formularon dúas denuncias administrativas por infraccións ao regulamento de transportes, unha por exceso de peso e outra por transportar mercadoría perecedoira nun vehículo non adecuado e sen ningún tipo de documentación. O vehículo quedou inmobilizado.
INCAUTACIÓN DE POLBO
Por outra banda, fontes da Comandancia de Pontevedra informaron tamén da incautación de 68 quilos de polbo que fora pescado nunha zona prohibida, e que foi intervido durante un control rutineiro da Garda Civil de Marín, en colaboración co Servizo de Gardacostas da Xunta de Galicia.
Os axentes deron o alto a un vehículo cuxo condutor levaba dous capazos de polbo, extraídos na zona de Vilariño, nunha área prohibida. Ao comprobar a documentación, os axentes tamén constataron que o condutor, veciño de Cangas de 46 anos de idade, ten a súa licenza de captura caducada. O home, que ten antecedentes por feitos similares, foi denunciado por infracción da lei de pesca e o polbo foi entregado ao Banco de Alimentos de Pontevedra.
