A oposición ourensá pide á Fiscalía que investigue os audios nos que Jácome busca eludir unha multa de tráfico

Podemos Ourense e o BNG reclamaron que se tomen medidas despois de coñecer uns audios nos que o rexedor ourensán, Gonzálo Pérez Jácome, pide a dous funcionarios municipais que asuman unha multa que o coche que habitualmente utiliza o alcalde recibiu en Vigo, e da que este venres o propio Jácome responsabilizou a outro traballador.

En concreto, o diario La Región adiantou estas gravacións, nas que o alcalde lles propón a estes funcionarios que digan que conducían eles e que estaban na cidade olívica por un congreso de tecnoloxía, algo ao que eles oponse alegando que "vai saír o seu nome" e vanlles " a ir encima".

"É un tema electoral. O que non pode ser é que me pillen a min. Con iso perdo votos", recolle La Región en relación a esta multa, cuxos 1.200 euros xa estaban abonados, pero na que se solicitaba que se identificase ao condutor.

ATRIBUÍUNA A OUTRO TRABALLADOR

Tras coñecerse a existencia desta multa, o rexedor de Ourense, no pleno deste venres, asegurou que o condutor era outro funcionario do concello e que viaxaba a Vigo "por unha causa xustificada". A multa foi posta o 3 de setembro de 2022, un sábado, cando ao redor do dez da noite o vehículo oficial do Concello de Ourense foi cazado por un radar fixo nas inmediacións de Samil a 88 km/hora nunha zona limitada a 50.

A multa nun principio ascendía a 400 euros, pero incrementouse ata os 1.200 ao non identificar o condutor ata o pasado mes de abril. No entanto, segundo adianta La Región, o Concello de Vigo emitiu unha resolución na que daba conta das alegacións nas que se identificaba ao condutor. Tras isto, deixaron a sanción nos 400 euros, 200 por pronto pago, e a retirada de catro puntos do carné.

A deputada do BNG Noa Presas, o deputado Iago Tabarés e o portavoz e candidato municipal nacionalista Luís Seara acudiron este sábado aos Xulgados de Ourense para presentar un escrito ante Fiscalía no que reclaman que se investigue a posible comisión de delitos derivados destes audios. Desde Podemos, Toño Naval, candidato por Agora Ourense, reclamou a dimisión de Jácome. "Non pode seguir nin un segundo máis á fronte da alcaldía de Ourense", dixo, tras considerar que estes feitos son "moi graves".

O PP TAMÉN ESTUDA DENUNCIAR

Pola súa parte, o Partido Popular de Ourense estuda acudir á vía xudicial para que se investigue a posible comisión dun delito. Os servizos xurídicos do PP ourensán analizan xa o caso en base a feitos similares presentados ante a Xustiza, así como a xurisprudencia do Tribunal Supremo, "na que se considera que identificar falsamente a un condutor por unha infracción de tráfico podería ser considerado como un delito de falsidade documental".

"A tenor do contido do audio, tentar suplantar a identidade do condutor dun vehículo enganando á Dirección Xeral de Tráfico, e á sociedade no seu conxunto, non só é un feito gravísimo, senón que tamén contribúe excesivamente á deterioración continuada da imaxe da nosa cidade", apuntan os populares.