Paula Prado volve xogar a carta de Bildu contra o BNG e pídelle aos nacionalistas que "condenen" a formación vasca
A secretaria xeral do PPdeG carga contra a Deputación de Lugo e o seu presidente, o socialista José Tomé.
Por E.P. | LUGO | 16/05/2023 | Actualizada ás 16:35
A secretaria xeral do PPdeG, Paula Prado, recalou en Vilalba --nunha xornada na que tamén visitará outros municipios da provincia de Lugo-- e pediu o apoio dos veciños cunha mensaxe: é "necesario un cambio" nunha Deputación que "non atende aos intereses" dos cidadáns. Tamén aproveitou para manifestar o seu desexo de que o BNG "deixe de arremeter" contra a súa formación e "condene a Bildu".
Prado visitou a capital da Terra Chá, onde apoiou á súa candidata, a deputada Sandra Vázquez, cuxo proxecto identificou con "unha clara mostra" do que representa o PP: "unha aposta por un proxecto solvente, serio e responsable".
No percorrido pola provincia, que continuará por Rábade, Triacastela e Guitiriz, manifestou o apoio aos seus candidatos que loitan por recuperar o bastón de mando --Vázquez, así como Reme González (Rábade) e José Manuel López (Guitiriz)--, pero tamén á alcaldesa de Triacastela, Olga Igrexas, que "demostra que se pode gobernar ben fronte aos concellos nos que se sofre o desgoberno da esquerda".
"Un desgoberno" que, incidiu, trasládase tamén á Deputación de Lugo, que encabeza o socialista José Tomei, candidato a reelixir alcalde en Monforte, e que "non é capaz de atender aos intereses dos veciños da provincia". Da Deputación de Lugo, advertiu que non responde as necesidades de todos os municipios da provincia porque actúa "de forma clientelar", polo que reivindicou un cambio que chegará, augurou, "da man do PP".
"QUE CONDENE A BILDU"
Máis aló, Prado cargou contra o BNG, do que afirmou que "non é unha alternativa para Galicia vendo como estes días aínda non condenou ao seu socio Bildu e as súas listas electorais con terroristas condenados por delitos de sangue, moitos deles galegos". "Temos 68 vítimas do terrorismo de ETA en Galicia, algunhas enterradas nesta provincia", dixo.
Respecto diso das recentes declaracións dos integrantes destas listas de que non van formar parte dos gobernos aínda que saian elixidos, Prado recalcou que "non son xente de fiar". "Esperamos que o BNG deixe de arremeter contra o PP e condene e se afaste de Bildu, que está blanqueando a todos estes terroristas que, en ningún caso, representan o sentir da súa democracia do século XXI", concluíu.
